కేంద్రంలో అధికారంలోకి రావడానికి కీలక రాష్ట్రమైన ఉత్తర ప్రదేశ్‌లో సార్వత్రిక ఎన్నికల్లో బీజేపీకి షాక్ తగిలింది. 80 లోక్ సభ స్థానాలు ఉండగా ఇండియా కూటమి 43 సీట్లు గెలుచుకోగా, బీజేపీ 33 సీట్లకు పరిమితమైంది. ఇండియా కూటమిలో సమాజ్ వాది పార్టీ 37, కాంగ్రెస్ పార్టీ 6 సీట్లు గెలుచుకున్నాయి. తమకు భారీ విజయాన్ని అందించిన ప్రజలకు కృతజ్ఞతలు చెప్పాలని కాంగ్రెస్ పార్టీ నిర్ణయించింది.
ఇందులో భాగంగా రాష్ట్రంలోని 403 అసెంబ్లీ నియోజకవర్గాలలో ‘ధన్యవాద్’ యాత్ర చేపట్టనుంది. కాంగ్రెస్ చేపట్టనున్న ధన్యవాద్ యాత్ర జూన్ 11న ప్రారంభమై 15న ముగియనుంది. ఈ యాత్రలో పార్టీ సీనియర్ నేతల నుంచి కార్యకర్తల వరకు అందరు పాల్గొంటారు. రాష్ట్రంలో ప్రజలను కలిసి కృతజ్ఞతలు తెలపనున్నారు. భారత రాజ్యాంగ ప్రతిని ఇచ్చి వారిని సత్కరించనున్నారు.