ఆంధ్రప్రభ బ్యూరో : దేశ రాజధాని ఢిల్లిలో జరుగుతున్న ఎన్నికలు రసవత్తరంగా మారాయి. అధికార ఆప్‌ను ఓడిచేందుకు బీజేపీ ప్రతి అవకాశాన్ని ఉపయోగించుకోవాలని చూస్తుంది. ఎన్డీఏ కూటమి పార్టీలను సైతం రంగంలోకి దించుతుంది. ఎన్డీఏలో కీలక భాగస్వామిగా ఉన్న టీడీపీ అధినేతను సైతం ప్రచారానికి ఆహ్వానించింది.
ఢిల్లిలో తెలుగు ఓటర్లు పెద్ద ఎత్తున ఉండటంతో సీఎం చంద్రబాబు ప్రచారంలో పాల్గొనబోతున్నారు. బీజేపీ అభ్యర్థుల తరుపున ఎన్నికల ప్రచార ర్యాలీ, సమావేశాల్లో పాల్గొనేలా షెడ్యూల్‌ సిద్ధం అయినట్లుగా విశ్వసనీయ సమాచారం. ఫిబ్రవరి 1న, రెండోవ తేదీన సీఎం చంద్రబాబు ఎన్నికల ప్రచారంలో పాల్గొననున్నారు.
ఇప్పటికే ఢిల్లీ అసెంబ్లీ ఎన్నికల ప్రచారం ఊపందుకుంది. పోలింగ్‌ కు సమయం దగ్గరపడుతున్న ప్రచారాన్ని ముమ్మరం చేశారు. మరో వారం రోజుల్లో పోలింగ్‌ జరగనున్న నేపథ్యంలో బీజేపీ గెలవాలనే గట్టే పట్టుదలతో పని చేస్తోంది. పార్టీ అభ్యర్థుల మద్దతు కోసం మిత్రపక్షాలను రంగంలోకి దించుతుంది.
ఢిల్లీలో వివిధ రాష్ట్రాల నుంచి పెద్ద సంఖ్యలో ఓటర్లు ఉన్నారు. హస్తినలో తెలంగాణ, ఆంధ్రప్రదేశ్‌ రాష్ట్రాల నుంచి సుమారు పది లక్షల మంది ప్రజలు నివసిస్తున్నారు. ఎన్డీఏలోని భాగస్వామ్య పార్టీల నేతలను ఇప్పటికే ప్రచారానికి బీజేపీ ఆహ్వానించింది. తెలుగుదేశంతో పాటు ఇతర మిత్రపక్ష పార్టీలను ప్రచారంలో పాల్గొనాల్సిందిగా కోరింది.
ఢిల్లీ అసెంబ్లీ ఎన్నికల్లో మిత్రపక్ష పార్టీలైన జనతా దళ్‌ యునైటెడ్‌, లోక్‌ జనశక్తి పార్టీ (రాం విలాస్‌ పాశ్వాన్‌) పార్టీలకు టికెట్లు ఇచ్చింది. ఢిల్లీ అసెంబ్లీ ఎన్నికల్లో ఇప్పటికే బీజేపీకి శివసేన మద్దతు ప్రకటించింది. ఇదే సందర్భంలో సీఎం చంద్రబాబుతో తెలుగు ఓటర్ల ఓట్లను రాబట్టేందుకు బీజేపీ ప్రయత్నిస్తుంది. సీఎం చంద్రబాబు సైతం రోడ్‌ షోతో పాటుగా ఓ సమావేశంలో పాల్గొని బీజేపీ అభ్యర్థుల గెలుపుకు కృషి చేయనున్నారు.