పాకిస్థాన్‌లోని తమ దౌత్య కార్యాలయాన్ని తాత్కాలికంగా మూసివేస్తున్నట్లు చైనా ప్రకటించింది. ఈ మేరకు అధికారిక వెబ్‌సైట్‌లో ఒక ప్రకటన విడుదల చేసింది. ఫిబ్రవరి 13 నుంచి తదుపరి ఉత్తర్వులు వెలువడే వరకు పాకిస్థాన్‌లోగల తమ రాయబార కార్యాలయంలోని దౌత్య విభాగం తాత్కాలికంగా మూసి ఉంటుందని ఆ ప్రకటనలో పేర్కొన్నది. సాంకేతికపరమైన సమస్యల వల్లే ఈ నిర్ణయం తీసుకున్నామని చెప్పింది. అయితే, కొద్ది రోజుల క్రితమే పాకిస్థాన్‌లో శాంతిభద్రతలు సరిగా లేవని, ఆ దేశంలోని తమ పౌరులు అప్రమత్తంగా ఉండాలని చైనా హెచ్చరికలు జారీ చేసింది.
పాకిస్థాన్‌లో గత ఏడాదికాలంగా ఉగ్రవాదుల దాడులు పెరిగిపోయాయని, అక్కడి ప్రభుత్వానికి వ్యతిరేకంగా తాలిబన్‌లు తరచూ దాడులకు పాల్పడుతున్నం దున చైనా పౌరులు అప్రమత్తంగా ఉండాలని ఆరోజు చేసిన హెచ్చరిక ప్రకటనలో పేర్కొన్నది. ఈ నేపథ్యంలో తాజాగా పాకిస్థాన్‌ రాయబార కార్యాలయంలోని తమ దౌత్య విభాగాన్ని మూసివేయడంపై సందేహాలు వ్యక్తమవుతున్నాయి. భద్రతాలోపం కారణంగానే చైనా ఈ నిర్ణయం తీసుకున్నట్లు తెలుస్తోంది.