న్యూఢిల్లీ, ఆంధ్రప్రభ: ఆంధ్రప్రదేశ్ అటవీ అభివృద్ధి సంస్థ (ఏపీఎఫ్‌డీసీ) ఎర్ర చందనం ఎగుమతులకు గాను ప్రతిష్టాత్మక క్యాపెక్సిల్ టాప్ ఎక్స్‌పోర్ట్ అవార్డు అందుకుంది. కేంద్ర వాణిజ్య, పరిశ్రమల శాఖ పరిధిలోని ఎగుమతుల ప్రోత్సాహక సంస్థ క్యాపెక్సిల్ అందించిన ఈ అవార్డును ఏపీఎఫ్‌డీసీ ఛైర్మన్ గుర్రంపాటి దేవేందర్ రెడ్డి, ఎగ్జిక్యూటివ్ డైరక్టర్ – చీఫ్ జనరల్ మేనేజర్ విజయ్ కుమార్ సంయుక్తంగా అందుకున్నారు. ఆంధ్రప్రదేశ్ రాష్ట్ర ప్రభుత్వం తరఫున జరిపిన ఎర్ర చందనం ఎగుమతులకు ఈ అవార్డు దక్కింది.
దుంగల రూపంలో ఎర్రచందనాన్ని విదేశాలకు ఎగుమతి చేస్తున్న ఏపీఎఫ్‌డీసీ, ఇప్పటి వరకు రూ. 2,003 కోట్ల విలువైన 6,572 మెట్రిక్ టన్నుల ఎర్రచందనం ఎగుమతి చేసినట్టు సంస్థ చైర్మన్ గుర్రంపాటి దేవేందర్ రెడ్డి తెలిపారు. ఢిల్లీలో జరిగిన ఓ కార్యక్రమంలో ఈ అవార్డు అందుకున్న అనంతరం ఆంధ్రప్రదేశ్ భవన్‌లో మీడియాతో మాట్లాడిన ఆయన.. మరో రూ. 2 వేల కోట్ల విలువైన 5,353 మెట్రిక్ టన్నుల ఎర్రచందనం దుంగలను దేశీయ మార్కెట్లో విక్రయించేందుకు సిద్ధంగా ఉన్నట్టు వెల్లడించారు.
2023 ఆర్థిక సంవత్సరంలో ఇప్పటి వరకు రూ. 218 కోట్ల విదేశీ మారకం వచ్చిందని, మరో రూ. 250 కోట్ల విదేశీ మారకం ఈ ఆర్థిక సంవత్సరంలో వస్తుందని అంచనా వేస్తున్నామని తెలిపారు. మరోవైపు డైరక్టర్ జనరల్ ఆఫ్ ఫారిన్ ట్రేడ్ (డీజీఎఫ్‌టీ) నుంచి త్రీ స్టార్ ఎక్స్‌పోర్ట్ హౌజ్ ర్యాకింగ్ కూడా తమ సంస్థకు దక్కిందని వెల్లడించారు. ఎగుమతులతో పాటు రిజర్వ్ ఫారెస్ట్ ప్రాంతాల్లో ఎకో-టూరిజం ప్రాజెక్టులను చేపట్టి సదుపాయాలు కల్పిస్తున్నామని తెలిపారు. ముఖ్యమంత్రి వైఎస్ జగన్మోహన్ రెడ్డి హయాంలో ఆంధ్రప్రదేశ్ రాష్ట్ర ఎగుమతుల్లో 15.31% వృద్ధి రేటు నమోదైందని వెల్లడించారు.