‘పుష్ప’ సినిమా అనేక సంచలనాలకు కేంద్రబిందువు అయింది. అల్లు అర్జున్‌ను ప్రపంచానికి పరిచయం చేసింది. కెరీర్‌ పరంగా మరింత ఎదగడానికి దోహదం చేసింది. ఈ సినిమాకు సంబంధించిన అందరికీ పేరు తెచ్చింది. ఇప్పుడు ‘పుష్ప 2 ‘ మొదలైంది. అల్లు అర్జున్‌ ఇక ముందు కూడా తెలుగు సినిమాలే చేసినా అవి పాన్‌ ఇండియా మార్కెట్‌లో ఉంటాయి. ఇదిలా ఉంటే ఈ మధ్య అల్లు అర్జున్‌పై ఓ హాలీవుడ్‌ దర్శకుడు ఫిదా అయ్యాడట. పుష్ప సినిమా ఆయనకు తెగనచ్చేసింది. తన తాజా చిత్రంలో అల్లు అర్జున్‌ చేత ఓ పాత్ర చేయించాలని ముచ్చటపడినట్టు సమాచారం.
ఇటీవలే అల్లు అర్జున్‌ న్యూయార్క్‌లో ఉన్నప్పుడు సదరు దర్శకుడు కలిసినట్టు తెలిసింది. ఇంకా ప్రాజెక్ట్‌ కార్యరూపం దాల్చలేదు కాబట్టి హాలీవుడ్‌ దర్శకుడు ఎవరనే వివరాలు వెల్లడికాలేదు. అల్లు అర్జున్‌ హాలీవుడ్‌ సినిమాలో నటిస్తే అది కూడా ఓ సంచలనే అవుతుంది. బాలీవుడ్‌ మాత్రమే కాదు హాలీవుడ్‌ సైతం టాలీవుడ్‌ వైపు చూడటం ఆసక్తి కలిగిస్తోందని సినీ వర్గాలు అంటున్నాయి.