న్యూఢిల్లీ, ఆంధ్రప్రభ : ఢిల్లీ పెద్దల జోక్యంతోనే బాబు అరెస్ట్ అయ్యారని.. ప్యాకేజీ స్టార్ పవన్ కళ్యాణ్ అరెస్ట్ నుంచి తనను కాపాడతారని చంద్రబాబు ఆశపడ్డారని ప్రజాశాంతి పార్టీ అధ్యక్షుడు కేఏ పాల్ చెప్పుకొచ్చారు. గురువారం ఆయన న్యూఢిల్లీలోని ఆంధ్రప్రదేశ్ భవన్‌లో మీడియాతో మాట్లాడారు. చిరంజీవి కాంగ్రెస్‌కి, పవన్ చంద్రబాబుకి అమ్ముడుపోయారని తీవ్రస్థాయిలో మండిపడ్డారు. బీజేపీ పవన్‌కి కనీసం అపాయింట్‌మెంట్ కూడా ఇవ్వట్లేదని ఎద్దేవా చేశారు.
జగన్ సత్తా ఉంటే నాలుగున్నరేళ్ల కిందటే చంద్రబాబును అరెస్ట్ చేసేవారని, ఢిల్లీ అధిష్టానం జోక్యంతోనే బాబు జైలుకు వెళ్లారని అన్నారు. టీడీపీ నుంచి బీజేపీలోకి వెళ్లిన నేతలు తనను జైలుకు వెళ్లకుండా కాపాడతారని బాబు భావించారని ఆయన తెలిపారు. తాను చేసిన పాపాలేంటో బాబుకు తెలుసునని, చీకట్లో చేసిన తప్పులు ఇప్పుడు వెలుగులోకి వస్తున్నాయని పాల్ తీవ్రస్థాయిలో వ్యాఖ్యానించారు. బీజేపీకి జగన్, చంద్రబాబు, కేసీఆర్ సరెండర్ అయ్యారని ఆయన విమర్శించారు.
ఏపీ ముఖ్యమంత్రి జగన్ ఎందుకు ఢిల్లీ వెళ్లారనే దానిపై ప్రజల్లో అనేక సందేహాలున్నాయని చెప్పారు. అభివృద్ధి విషయంలో ఏపీ, తెలంగాణ దిగజారిపోయాయని వాపోయారు. బీఆర్ఎస్, టీడీపీ, వైసీపీ అధికారం గురించి ఆరాటపడుతున్నాయే తప్ప అభివృద్ధి గురించి ఆలోచించట్లేదన్నారు. తెలంగాణలో బీఆర్‌ఎస్‌కి ఓటేస్తే కాంగ్రెస్‌కు వేసినట్టేనని కేఏ పాల్ అభిప్రాయపడ్డారు. బీజేపీ తనకు కేంద్రమంత్రి పదవి ఆఫర్ చేసిందని, తనను కొనే డబ్బు ఈ ప్రపంచంలోనే లేదని అన్నారు. ఆప్‌ని గెలిపించినట్టే తెలంగాణ ప్రజలు ప్రజాశాంతి పార్టీని గెలిపిస్తారని, బీఆర్‌ఎస్‌కి బుద్ది చెప్తారని పాల్ ధీమా వ్యక్తం చేశారు.