జేమ్స్ కామెరూన్ డైరెక్ట్ చేసిన ‘అవతార్’ హాలీవుడ్ లో సంచలనం సృష్టించింది. 13 ఏళ్ల క్రితం వచ్చిన ఈ విజువల్ వండర్ సినీ ప్రేక్షకులను సరికొత్త ప్రపంచంలోకి తీసుకెళ్లింది. భారీ బడ్జెట్ తో తెరకెక్కి అన్ని భాషల్లోనూ వసూళ్ల వర్షం కురిపించింది. దీనికి కొనసాగింపు‌‌‌‌‌‌‌‌‌‌‌‌‌‌గా ఇప్పుడు ‘అవతార్ 2’ వస్తోంది. ‘ద వే ఆఫ్ వాటర్’ పేరుతో డిసెంబర్ 16న ప్రపంచ వ్యాప్తంగా విడుదల కానుంది. ఇంగ్లిష్ తో పాటు పలు భారతీయ భాషల్లో ప్రేక్షకులను అలరించనుంది. ఏకంగా 160 భాషల్లో రిలీజ్ అవుతోంది.
ఇక.. భారత్ లో హిందీ, తెలుగు, తమిళ, కన్నడ, మలయాళ భాషల్లో ఈ సనిమా విడుదలవుతోంది. ఈ చిత్రం మరో రోజు అంటే రేపు థియేటర్లలో సందడి చేయనుందనగా.. చిత్రబృందానికి పైరసీదారులు షాకిచ్చారు. గురువారమే ఈ చిత్రాన్ని లీక్ చేశారు. మొత్తం చిత్రాన్ని ఆన్ లైన్ లో పెట్టేశారు. లండన్ లో ఈ నెల 6వ తేదీనే విడుదల కావడంతో ఈ చిత్రం కాపీని టెలీగ్రామ్ తో పాటు టోరెంట్ సైట్లలో అందుబాటులో ఉంచారు. దాంతో పలువురు దీన్ని డౌన్ లోడ్ చేసుకొని ఫ్రీగా చూస్తూ ఎంజాయ్ చేస్తున్నారు. చిత్రం లింక్స్ ను సోషల్ మీడియా ప్లాట్ ఫామ్స్ లో విపరీతంగా షేర్ చేసుకుంటున్నారు.