మార్కెట్లోకి ఆపిల్ 14 సిరీస్ ఫోన్లు.. భారీగా త‌గ్గిన ఐఫోన్ 13 సిరీస్ ధ‌ర‌లు

ఆపిల్ నుంచి ఐఫోన్ 14 సిరీస్ మార్కెట్ లో వచ్చేసింది. iPhone 14, iPhone 14 plus, iPhone 14 pro, iPhone 14 pro Max మోడల్స్‌ను ఘ‌నంగా లాంచ్ చేసింది ఆపిల్. అయితే.. iPhone 13 మోడ‌ల్ ధరలను భారీగా తగ్గించేసింది కంపెనీ. దాదాపు.. వీటి ధరలో రూ.10,000 కోత విధించింది. ఇప్పటికే ఆపిల్ వెబ్‌సైట్‌తో పాటు ఈ-కామర్స్ ప్లాట్‌ఫామ్‌లు, ఆఫ్‌లైన్ స్టోర్స్‌నూ ఈ కొత్త ధరలు అందుబాటులోకి వచ్చుశాయి. మరి ఐఫోన్ 13 కొత్త ధరలు ఎలా ఉన్నాయి ? ఇప్పుడు కొనొచ్చా? ఇప్పుడు వ‌చ్చిన కొత్త మోడ‌ల్ ఐఫోన్ 14తో పోలిస్తే ఎలా ఉంది? ఈ-కామర్స్ సైట్స్ సేల్స్ ఈనెలలోనే జరగనుండడంతో అప్పటి వరకు ఆగాలా అన్న విషయాలు ఇక్కడ చూడండి.

ఐఫోన్ 13 కొత్త ధరలు..

ఐఫోన్ 13 128 GB మోడల్ ధర : రూ.69,900
ఐఫోన్ 13 256 GB మోడల్ ధర : రూ.79,900
ఐఫోన్ 13 512 GB మోడల్ ధర : రూ.99,900

iPhone 13 ఇప్పుడు కొనొచ్చా..?

ఐఫోన్ 14 లాంచ్ అయింది. మరి ఇప్పుడు ఐఫోన్ 13 కొనొచ్చా అనే సందేహం చాలా మందికి ఉంటుంది. అయితే కాస్త తక్కువ ధరకు కావాలంటే ఐఫోన్ 13 తీసుకోవడం ఇప్పటికీ మంచి ఆప్షనే. ఎందుకంటే ఐఫోన్ 13తో పోలిస్తే ఐఫోన్ 14 పెద్దగా అప్‌గ్రేడ్ అవ్వ‌లేదు. ఐఫోన్ 14తో పోలిస్తే రూ.10వేల తక్కువ ధరకు లభిస్తుంది కాబట్టి ఐఫోన్ 13ను తీసుకోవడం మంచి ఆప్షనే అవుతుంది. అన్ని విభాగాల్లోనూ ఐఫోన్ 13 మంచి పర్ఫార్మెన్స్‌ చేస్తుంది. ఇప్పటికీ వన్ ఆఫ్ ది బెస్ట్ మొబైల్‌గా ఉంది. ఐఫోన్ 13 ప్రో మోడల్స్‌తో పోలిస్తే ఐఫోన్ 14 ప్రో, ఐఫోన్ 14 ప్రో మ్యాక్స్‌లో భారీ అప్‌గ్రేడ్స్ ఉన్నాయి. అయితే ఐఫోన్ 13తో పోలిస్తే ఐఫోన్ 14 మాత్రం చెప్పుకోదగ్గ అప్‌గ్రేడ్స్‌తో రాలేదు. కాకపోతే కొన్ని ఫీచర్లు కొత్తగా వచ్చాయి.

iPhone 13లానే.. ఐఫోన్ 14 కూడా 6.1 ఇంచుల OLED సూపర్ రెటీనా XDR డిస్‌ప్లేతోనే రాగా.. బ్రైట్‌నెస్ మాత్రం కాస్త ఎక్కువగా ఉంది. డిజైన్‌లో మార్పు లేదు. ఐఫోన్ 13లో ఉన్న బయోనిక్ ఏ15 ప్రాసెసర్‌నే ఐఫోన్ 14లోనూ ఉంది. అయితే కొత్త మోడల్ పర్ఫార్మెన్స్ మెరుగ్గా ఉంటుందని తెలుస్తోంది. 12 మెగాపిక్సెల్ కెపాసిటీ ఉన్న రెండు రేర్ కెమెరాలు, 12 మెగాపిక్సెల్ ఫ్రంట్ కెమెరాతోనే ఐఫోన్ 14 వచ్చింది. కానీ ఐఫోన్ 13 కంటే పెద్ద సైజ్‌ లెన్స్‌తో లాంచ్ అయింది. ఐఫొన్ 14లో కొత్త‌గా క్రాష్ డిటెక్షన్ ఫీచర్ యాడ్ అయింది. ఈ ఫోన్లో బ్యాటరీ లైఫ్ కాస్త మెరుగ్గా ఉంటుందని యాపిల్ చెబుతోంది. ఒకవేళ ఐఫోన్ 13 కంటే ఎక్కువ బ్రైట్‌నెస్ ఉన్న డిస్‌ప్లే, కాస్త మెరుగైన కెమెరా పర్ఫార్మెన్స్, కొన్ని అదనపు ఫీచర్లు కావాలంటే ఐఫోన్ 14 తీసుకోవచ్చు. అయితే బేస్ వేరియంట్‌కు రూ.79,900 ఖర్చు చేయాలి. మొత్తంగా అయితే ఇప్పుడు కూడా ఐఫోన్ 13ను తీసుకోవడం మంచి ఆప్షనే.

ఈనెలాఖరులోనే ఈ-కామర్స్ సంస్థలు సేల్స్ తీసుకొస్తున్నాయి. ఫ్లిప్‌కార్ట్‌లో బిగ్ బిలియన్ డేస్, అమెజాన్‌ గ్రేట్ ఇండియన్ ఫెస్టివల్ సేల్స్ ఉండనున్నాయి. ఈ సేల్స్‌లో iPhone 13 మరింత తక్కువ ఫ్రైజ్ కే అందుబాటులోకి వచ్చే అవకాశం ఉంటుంది. ప్రత్యేక బ్యాంక్ కార్డ్ ఆఫర్లు కూడా ఉంటాయి. అలాగే ఆఫ్‌లైన్ స్టోర్స్‌లోనూ ఫెస్టివల్స్ సేల్స్ ఉండొచ్చు. కంపేర్ చేసుకొని కొనుగోలు చేస్తే బెస్ట్.