అమరావతి,ఆంద్రప్రభ: రాష్ట్ర పరిధిలోని యూనివర్శిటీల కాలేజీలు, అనుబంధ కాలేజీల్లో ఎంబిఎ, ఎంసిఎ కోర్సుల ప్రవేశానికి గాను ఏపీ ఐసెట్‌ కౌన్సిలింగ్‌ షెడ్యూల్‌ను రాష్ట్ర ఉన్నత విద్యా మండలి విడుదల చేసింది. ఇవ్వాల (బుధవారం) విడుదల చేసిన పత్రికా ప్రకటన ప్రకారం ఐసెట్‌ కౌన్సిలింగ్‌కు రేపు (గురువారం) పత్రికా ప్రకటన ఇస్తారు. 8వ తేదీ నుండి 14వ తేదీ వరకు వెబ్‌ కౌన్సిలింగ్‌కు రిజిస్ట్రేషన్లు చేసుకోవచ్చు. తొమ్మిదో తేదీ నుండి 16వ తేదీ వరకు సర్టిఫికేట్ల వెరిఫికేషన్‌ ఉంటుంది.
12వ తేదీన స్పెషల్‌ కేటగీరి అభ్యర్ధుల సర్టిఫికెట్లను పరిశీలిస్తారు. 19వ తేదీ నుండి 21వ తేదీ వరకు వెబ్‌ అప్షన్లను నిర్వహించుకోవచ్చు. 22వ తేదీన వెబ్‌ అప్షన్లను మార్చుకోవచ్చు. 25వ తేదీన మొదటి దశ కౌన్సిలింగ్‌కు సంబంధించి సీట్ల కేటాయింపు చేస్తారు. 26వ తేదీన కాలేజీలకు వెళ్లి రిపోర్టింగ్‌ చేయాలి. 27వ తేదీ నుండి క్లాసులు ప్రారంభమవుతాయి. 30వ తేదీ నాటికి ఖాళీల వివరాలను ఉన్నత విద్యా మండలికి తెలియజేయాలి.