కడప జిల్లా మామిళ్లపల్లి ముగ్గురాయి గనుల వద్ద శనివారం జరిగిన జిలెటిన్ స్టిక్స్ పేలుడు ఘటనలో 10 మంది చనిపోయిన సంగతి తెలిసిందే. ఈ ఘటనపై మంత్రి పెద్దిరెడ్డి రామచంద్రారెడ్డి స్పందించారు. తక్షణ పరిహారంగా మృతుల కుటుంబాలకు రూ.10 లక్షలు ఇస్తున్నట్టు వెల్లడించారు. ఈ ప్రమాదంలో క్షతగాత్రులకు రూ.5 లక్షల చొప్పున ఆర్థికసాయం చేస్తున్నట్లు తెలిపారు.
మామిళ్లపల్లె పేలుడు ఘటనపై 5 ప్రభుత్వ శాఖలతో ఉన్నతస్థాయి విచారణ కమిటీ ఏర్పాటు చేసినట్టు మంత్రి పెద్దిరెడ్డి పేర్కొన్నారు. ఐదు రోజుల్లో ఈ కమిటీ ప్రభుత్వానికి సమగ్ర నివేదిక ఇస్తుందన్నారు. క్వారీ నిర్వాహకుల నిర్లక్ష్యం వల్లే ప్రమాదం జరిగినట్టు గుర్తించామని, క్వారీ లీజుదారుడిపై చట్టపరమైన చర్యలు తీసుకుంటామని పెద్దిరెడ్డి స్పష్టం చేశారు. పేలుడు పదార్థాల అన్ లోడింగ్‌లో నిబంధనలు పాటించలేదని వెల్లడించారు.