తిరుపతి ఉపఎన్నికలో విజయం సాధించేందుకు కమలం పార్టీ అన్ని వ్యూహాలకు పదును పెడుతోంది. ఈ నేపథ్యంలో తిరుపతి ఉపఎన్నికకు బీజేపీ-జనసేన ఉమ్మడి అభ్యర్థిగా మాజీ ఐఏఎస్ రత్నప్రభ పేరును ఖరారు చేసినట్లు తెలుస్తోంది. ప్రకాశం జిల్లాకు చెందిన రత్నప్రభ., కర్ణాటక కేడర్ ఐఏఎస్‌గా అనేక కీలక బాధ్యతలు నిర్వహించారు. ఆ రాష్ట్ర ప్రభుత్వ ప్రధాన కార్యదర్శిగా కూడా పనిచేశారు. ముక్కుసూటి అధికారిగా పేరున్న ఆమెకు ఫైర్‌ బ్రాండ్‌ ముద్ర కూడా ఉంది. అందువల్ల రత్నప్రభ అయితేనే వైసీపీ ప్రభుత్వాన్ని ధీటుగా ఎదుర్కొంటారన్న ఉద్దేశంతో ఆమె అభ్యర్థిత్వాన్ని బీజేపీ అధిష్టానం ఖరారు చేసినట్లు తెలుస్తోంది.
