తెలంగాణలో అగ్నివీరుల రిక్రూట్‌మెంట్‌ ర్యాలీ తేదీలు, వేదిక ఖరారయ్యాయి. వచ్చే నెల (డిసెంబర్‌) 8వ తేదీ నుంచి 16వ తేదీ వరకు హైదరాబాద్, గచ్చిబౌలిలోని జీఎంసీ బాలయోగి అథ్లెటిక్‌ స్టేడియంలో రిక్రూట్‌మెంట్‌ ర్యాలీలు జరగనున్నాయని అధికారులు వివరించారు.
ఈ రిక్రూట్‌మెంట్‌ ప్రక్రియ పూర్తి పారదర్శకంగా జరగుతుందని అధికారులు తెలిపారు. రాష్ట్రంలోని 33 జిల్లాలకు చెందిన యువతను సైన్యంలో అగ్నివీరులుగా చేర్చుకోవడానికి ఈ రిక్రూట్‌ మెంట్‌ ర్యాలీ నిర్వహించనున్నట్లు వెల్లడించారు. అగ్నివీర్‌ జనరల్‌ డ్యూటీ, అగ్నివీర్‌ టెక్నికల్‌, అగ్నివీర్‌ క్లర్క్‌/స్టోర్‌ కీపర్‌ టెక్నికల్‌, అగ్నివీర్‌ ట్రేడ్స్‌మెన్‌ కేటగిరీల్లో ఈ భర్తీలు చేపట్టనున్నారు.
అగ్నివీర్‌ ట్రేడ్స్‌మెన్‌కు 8వ తరగతి ఉత్తీర్ణత కాగా.. ఇతర విభాగాలకు పదో తరగతి ఉతీర్ణులై ఉండాలి. కాగా డబ్బులిస్తే రిక్రూట్‌మెంట్‌ ర్యాలీలో ఉత్తీర్ణత సాధించడానికి సాయం చేస్తామని ఎవరైనా చెబితే నమ్మొద్దని ఆర్మీ అధికారులు యువతకు సూచించారు.