న్యూఢిల్లీ, ఆంధ్రప్రభ: కార్మిక వ్యతిరేక లేబర్ కోడ్‌లను రద్దు చేయాలని డిమాండ్ చేస్తూ దేశ రాజధాని ఢిల్లీలో ట్రేడ్ యూనియన్ సెంటర్ ఆఫ్ ఇండియా (టీయుసీఐ) చేపట్టిన ధర్నా విజయవంతమైంది. జంతర్ మంతర్‌లో శుక్ర, శని, ఆదివారం టీయూసీఐ ఆధ్వర్యంలో పెద్దఎత్తున నిరసన ప్రదర్శన తలపెట్టారు. ప్రభుత్వ పరిశ్రమల ప్రైవేటీకరణను ఆపాలనే నినాదంతో చేపట్టిన ఆందోళన కార్యక్రమంలో డిల్లీ ప్రతినిధులతో పాటు తెలంగాణ, ఆంధ్రప్రదేశ్, పశ్చిమ బెంగాల్, కేరళ, తమిళనాడు, మహారాష్ట్ర, చత్తీస్‌గఢ్ తదితల రాష్ఠ్రాల ప్రతినిధులు, ఇతర సంఘాల నాయకులు నిరసనలో పాల్గొన్నారు. టీయూసీఐ కేంద్ర ప్రధాన కార్యదర్శి సంజయ్ సింఘ్వీ, జి.ఎస్.ఏ.ఐ.టి.యు.సి జాతీయ నాయకులతో పాటు తెలంగాణ సింగరేణి గని కార్మిక సంఘం టి.ఎస్.జి.కె.ఎస్ గౌరవాధ్యక్షులు గడ్డం సదానందం తదితరులు పాల్గొన్నారు.
ప్రధాని మోదీ మూడు ఫాసిస్ట్ చట్టాలను బలవంతంగా రద్దు చేసినట్లే నాలుగు లేబర్ కోడ్‌లకు వ్యతిరేకంగా పోరాడేందుకు అన్ని కార్మిక సంఘాలు, కార్మిక సంఘాలు ఒకే వేదికపైకి రావాలని యూనియన్ నాయకులు పిలుపునిచ్చారు. కాంట్రాక్ట్ వ్యవస్థను రద్దు చేసి శాశ్వత ఉపాధి, పెన్షన్, ప్రసూతి సెలవులతో సహా సామాజిక భద్రత, పని భద్రతలను కల్పించాలని డిమాండ్ చేశారు. దేశంలోని కార్మికు లందరికీ కనీస వేతనం రోజుకు వెయ్యి రూపాయలు నెలవారీ 28 వేల రూపాయల పొందేలా, 15 వేల రూపాయలు నిరుద్యోగ భృతి అందేలా చూడాలని కేంద్ర ప్రభుత్వాన్ని కోరారు. మైనారిటీల పట్ల ద్వేషాన్ని, మత ద్వేషాన్ని పెంచడానికి ప్రయత్నిస్తూ మోదీ ప్రభుత్వం ప్రజలను ఉన్మాద మూకగా మారుస్తోందని, కార్పొరేట్ శక్తులతో కుమ్మక్కై ఖజనా నింపుకోవడానికి ప్రయత్నిస్తోందని ఆరోపించారు.
దేశంలోని 55.2 కోట్ల మంది ప్రజల సంపదకు సమానమైన సంపద కేవలం 98 మంది ధనవంతుల వద్ద మాత్రమే ఉందని నివేదికలు చెబుతున్నాయన్నారు. రైళ్లు, బీహెచ్‌ఈఎల్, చమురు, గ్యాస్, రోడ్లు, విమానాశ్రయాలు, పోర్టులు, టెలికమ్యూనికేషన్స్, విద్యుత్, బొగ్గు, బ్యాంకులు, బీమా, రక్షణ వంటి వాటిని ప్రైవేట్ వ్యక్తులకు అప్పగించి దేశాన్ని అమ్మేస్తున్నారని విమర్శించారు. కేంద్ర కార్మిక సంఘాలు, ఇతర సంఘాలు కొత్త లేబర్ కోడ్‌లను వ్యతిరేకించాయని యూనియన్ నేతలు చెప్పుకొచ్చారు. కార్మికుల హక్కులపై జరుగుతున్న ప్రభుత్వ దాడికి వ్యతిరేకంగా అన్ని సంఘాలు ఏకతాటిపైకి రావాలని పిలుపునిచ్చారు. నల్లచట్టాలపై పోరాడేందుకు, కార్మికుల సమగ్ర వేదిక ఏర్పాటుకు టీయూసీఐ నిర్వహించిన ధర్నా ఆధారమవుతుందని అభిప్రాయపడ్డారు. రైతులంతా కలిసి రైతు వ్యతిరేక చట్టాల రద్దు కోసం పోరాడిన తీరును ఉదహరించారు.