హెయిర్ డ్రైయర్ పేలడంతో ఓ మహిళ రెండు చేతులను కోల్పోయింది. ఈ ఘటన కర్ణాటకలోని బాగల్‌కోట్ జిల్లా ఇల్కల్ నగరంలో చోటుచేసుకుంది.ఆన్‌లైన్‌లో ఆర్డర్ చేసిన హెయిర్ డ్రైయర్ శశికళ అనే మహిళ ఇంటికి వచ్చింది. అయితే, ఆమె ఇంట్లో లేకపోవడంతో కొరియర్ బాయ్ పక్క ఇంట్లో ఉన్న బసవరాజేశ్వరికి అప్పగించాడు.
ఈ క్ర‌మంలో ఓ సారి చెక్ చేద్దాం అనుకుని పార్సెల్ ఓపెన్ చేసి హెయిర్ డ్రైయర్ స్విచ్ ఆన్ చేయగా, అది పేలి మహిళ రెండు చేతులు తీవ్రంగా కాలిపోయాయి. వెంటనే ఆమెను ఇల్కల్‌లోని ఓ ప్రైవేట్‌ ఆస్పత్రిలో చేర్పించగా… వైద్యులు ఆపరేషన్‌ సమయంలో రెండు చేతులు తీసేయాల్సి వచ్చింది. ఈ విషయం తెలుసుకున్న శశికళ కూడా ఆసుపత్రికి చేరుకుని బసమ్మ పరిస్థితిని తెలుసుకున్నారు.
అయితే ఆసుపత్రిలో శశికళ చెప్పిన మాటలు మరింత ఆశ్చర్యం కలిగించాయి. శశికళ హెయిర్ డ్రయ్యర్ ఆర్డర్ చేయలేదని, అయితే హెయిర్ డ్రైయర్ పార్శిల్ తన పేరు మీద ఎలా వచ్చిందని? డబ్బులు ఎవరు ఇచ్చారనే ప్రశ్న తలెత్తుతోంది. కాగా, డీటీడీసీ కొరియర్ ద్వారా వచ్చిన ఈ హెయిర్ డ్రయ్యర్ ఏపీలోని విశాఖపట్నంలో తయారైనట్లు పోలీసులు గుర్తించారు. ఈ పేలుడు పలు అనుమానాలకు తావిస్తోంది.