పాలపుంతలో ఒక విచిత్రమైన స్పిన్నింగ్‌ వస్తువును ఆస్ట్రేలియన్ పరిశోధకులు కనుగొన్నారు. ఇప్పటి వరకు ఇలాంటి వింతను గుర్తించలేదని ఖగోళ శాస్త్రవేత్తలు తెలిపారు. అండర్ గ్రాడ్యుయేట్‌ థీసిస్‌పై పనిచేస్తున్న విశ్వవిద్యాలయ విద్యార్థి మొదట ఈ వస్తువును గుర్తించాడు. అది ప్రతి గంటకు మూడు
సార్లు రేడియో శక్తిని విడుదల చేస్తున్నట్లు నిర్ధారణకు వచ్చాడు. పల్స్‌ ”ప్రతి 18.18 నిమిషాలకు క్లాక్‌ వర్క్‌ లాగా వస్తోంది” అని ఖగోళ భౌతిక శాస్త్రవేత్త నటాషా హర్లీ-వాకర్‌ చెప్పారు. విద్యార్థి
గుర్తించిన వింతవస్తువుపై పరిశోధనకు వాకర్‌ నాయకత్వం వహిస్తున్నారు. పశ్చిమ ఆస్ట్రేలియా అవుట్‌బ్యాక్‌లోని మర్చిసన్ వైడ్‌ఫీల్డ్‌ అర్రే అని పిలువబడే టెలిస్కోప్‌ను ఉపయోగించి ఈ
కొత్త దృశ్యాన్ని గుర్తించామని చెప్పారు. పల్సర్‌ల వంటి స్విచ్‌ ఆన్‌- ఆఫ్‌ చేసే ఇతర వస్తువులు విశ్వంలో
ఉన్నప్పటికీ 18.18 నిమిషాల కొకసారి సంకేతాలిచ్చే వస్తువును చూడటం ఇదే తొలిసారి అని చెప్పారు. కొన్ని సంవత్సరాల కిందటి డేటాను పరిశీలిస్తే వారు కొన్ని వాస్తవాలను గుర్తించగలిగారు.
ఈ వస్తువు భూమి నుండి 4,000 కాంతి సంవత్సరాల [Light years] దూరంలో ఉంది. చాలా ప్రకాశవంతంగా ఉంటుంది. చాలా బలమైన అయస్కాంత క్షేత్రాన్ని కలిగి ఉంది. అయితే దీనికి
సంబంధించి ఇంకా చాలా రహస్యాలు ఛేదించాల్సి ఉంది అని హార్లీ-వాకర్‌ తెలిపారు.
ఇది తెల్ల మరగుజ్జుగా కనిపిస్తోంది. బహుశా కూలిపోయిన నక్షత్రం అవశేషం కూడా కావచ్చు. ”కానీ ఇది చాలా అసాధారణమైనది” అని హర్లీ-వాకర్‌ చెప్పారు. అంతరిక్షం నుండి వచ్చే శక్తివంతమైన, స్థిరమైన రేడియో సిగ్నల్‌ను వేరే ఏదైనా జీవ రూపం ద్వారా పంపారా అనే ప్రశ్నతో హార్లీ ఏకీభవించారు. తొలుత గ్రహాంతర వాసులుగా భావించాము. కానీ, పరిశోధనా బృందం విస్తృత శ్రేణి పౌన:పున్యాలలో సిగ్నల్‌ను గమనించగలిగింది. అంటే ఇది సహజ ప్రక్రియ అయి ఉండాలి అని అభిప్రాయపడ్డారు.
లోక‌ల్ టు గ్లోబ‌ల్.. ప్రభన్యూస్ కోసం ఫేస్‌బుక్‌, ట్విట‌ర్, టెలిగ్రామ్ పేజీల‌ను ఫాలో అవ్వండి..