- పెళ్లి చేసుకుంటానని మోసం చేశాడని యువతి ఫిర్యాదు
- ఇది వ‌ర‌కే కూకట్పల్లి పీఎస్‌లో ఓ ఫిర్యాదు
ఆంధ్ర‌ప్ర‌భ స్మార్ట్‌, హైద‌రాబాద్ : మ‌హిళ‌ల వేధింపులకు సంబంధించి టాలీవుడ్ ఇండ‌స్ట్రీకి చెందిన న‌టుల‌పై కేసు న‌మోదవుతున్నాయి. అదే కోవ‌లో సినీ హీరో, క్యార‌క్ట‌ర్ యాక్ట‌ర్ శ్రీ‌తేజ్‌పై కేసు న‌మోద‌యింది. ఇప్ప‌టికే హీరో రాజ్ తరుణ్-లావణ్యల వ్యవహారం ఇండస్ట్రీని కుదిపేసిన సంగ‌తి తెలిసిందే. కొద్దిరోజుల క్రితం ప్రముఖ కొరియోగ్రాఫర్‌ జానీ మాస్టర్‌పై లైంగిక వేధింపుల కేసు నమోదైంది.
ఇటీవల యూట్యూబర్‌ హర్ష సాయిపై కూడా ఓ యువతి కేసు పెట్టింది. తాజాగా శ్రీ‌తేజ‌పై ఓ యువతి ఫిర్యాదు చేసింది. తాజాగా నమోదైన కేసుతో ప్రస్తుతం శ్రీతేజ్ ఆజ్ఞాతంలోకి వెళ్లిన‌ట్లు తెలిసింది. ఆయన కోసం పోలీసులు ముమ్మరంగా గాలిస్తున్నారు.
పెళ్లి చేసుకుంటానని న‌మ్మించాడ‌ని…
ప్రముఖ నటుడు శ్రీ తేజ్‌పై కూకట్పల్లి పీఎస్‌లో కేసు నమోదైంది. శ్రీ తేజ్ తనను పెళ్లి చేసుకుంటానని నమ్మించి మోసం చేశాడని ఓ యువతి ఫిర్యాదు చేసింది. యువతి ఫిర్యాదు మేరకు శ్రీ తేజ్‌పై కూకట్పల్లి పోలీసులు కేసు నమోదు చేశారు. బీఎన్‌ఎస్ 69, 115(2), 318(2) సెక్షన్‌ల కింద అతడిపై కేసు నమోదు చేశారు. శ్రీ తేజ్‌పై ఇదివరకే కూకట్పల్లి పీఎస్‌లో ఓ ఫిర్యాదు ఉంది. ఓ మ‌హిళ‌తో శ్రీ తేజ్ వివాహేతర సంబంధం పెట్టుకున్నాడు. ఈ విష‌యం తెలిసి ఆమె భ‌ర్త గుండెపోటుతో మరణించారు. ఈ ఘటనలో శ్రీ తేజ్‌పై కేసు నమోదైంది.