పార్టీలకు అతీతంగా మానవత్వం చాటుకున్న మున్సిపల్ కౌన్సిలర్లు

• తోటి సభ్యురాలి కుటుంబానికి ఒక నెల వేతనం విరాళం
• చెంచల శ్రీనివాస్ కుటుంబానికి రూ 2,40,000 అందజేసిన మున్సిపల్ కౌన్సిల్ సభ్యులు

సూర్యాపేట, ఆంధ్రప్రభ : మానవత్వానికి రాజకీయాలు అడ్డురావని సూర్యాపేట మున్సిపల్‌ కౌన్సిలర్లు చాటిచెప్పారు. తోటి ప్రజాప్రతినిధి కుటుంబం ఆపదలో ఉన్నప్పుడు అండగా నిలవడమే తమ బాధ్యత అన్నట్లుగా పార్టీలకతీతంగా ఏకతాటిపైకి వచ్చారు. ఇటీవల అనారోగ్యంతో మృతిచెందిన 20వ వార్డు కౌన్సిలర్‌ చెంచల మణిలత భర్త, మాజీ కౌన్సిలర్‌ చెంచల శ్రీనివాస్‌ కుటుంబానికి తమ ఒక నెల గౌరవ వేతనాన్ని ఆర్థిక సహాయంగా అందజేశారు.

రూ.2.40 లక్షల ఆర్థిక సాయం

స్థానిక ఎస్వీ డిగ్రీ కళాశాల ఫంక్షన్‌ హాల్‌లో ఆదివారం చెంచల శ్రీనివాస్‌ సంస్మరణ సభ నిర్వహించారు. ఈ కార్యక్రమానికి అధికార, ప్రతిపక్ష పార్టీలకు చెందిన కౌన్సిలర్లందరూ హాజరై ఆయన చిత్రపటానికి పూలమాలలు వేసి నివాళులర్పించారు.

శ్రీనివాస్‌ కుటుంబ పరిస్థితిని దృష్టిలో ఉంచుకుని అండగా నిలవాలని నిర్ణయించిన కౌన్సిలర్లు.. తమకు ప్రభుత్వం నుంచి అందే ఒక నెల గౌరవ వేతనాన్ని కుటుంబానికి అందజేయాలని నిర్ణయించారు. ఈ మేరకు సేకరించిన రూ.2.40 లక్షలను కౌన్సిలర్‌ చెంచల మణిలత, ఆమె కుమారుడు చెంచల నిఖిల్‌ నాయుడుకు అందజేశారు. భవిష్యత్తులోనూ కుటుంబానికి అండగా ఉంటామని భరోసా ఇచ్చారు.

పార్టీలకతీతంగా ఏకతాటిపైకి..

రాజకీయాల్లో విమర్శలు, ప్రతివిమర్శలు సాధారణంగా మారిన ప్రస్తుత పరిస్థితుల్లో.. పార్టీల భేదాలను పక్కనపెట్టి తోటి కౌన్సిలర్‌ కుటుంబానికి ప్రజాప్రతినిధులంతా అండగా నిలవడం పట్ల పట్టణ ప్రజలు హర్షం వ్యక్తం చేస్తున్నారు. ఈ సందర్భంగా కౌన్సిలర్లు ప్రదర్శించిన ఐక్యత, మానవత్వం స్థానికంగా చర్చనీయాంశంగా మారింది.

కార్యక్రమంలో మున్సిపల్‌ చైర్‌పర్సన్‌ మొరిశెట్టి నివేదితలక్ష్మి, వైస్‌ చైర్మన్‌ మహమ్మద్‌ షఫీ ఉల్లా, కాంగ్రెస్‌ పార్టీ ఫ్లోర్‌ లీడర్‌ కుమ్మరికుంట్ల వేణుగోపాల్‌, బీఆర్‌ఎస్‌ పార్టీ ఫ్లోర్‌ లీడర్‌ నాగార్జున అంగిరేకుల తదితర కౌన్సిలర్లు పాల్గొన్నారు.