Human vs Robot Fight | ఆరు అడుగుల రోబోతో తలపడిన ఇన్‌ఫ్లుయెన్సర్‌.. వైరల్‌గా మారిన వీడియో
ఆంధ్రప్రభ, వెబ్‌డెస్క్‌: హాలీవుడ్‌ సినిమాల్లో మాత్రమే కనిపించే దృశ్యం నిజ జీవితంలో కనిపించింది. ఆరు అడుగుల ఎత్తైన ఓ హ్యూమనాయిడ్‌ రోబో ఫైటింగ్‌ రింగ్‌లోకి దిగి మనిషితో పోరాడింది. అమెరికాలోని శాన్‌ఫ్రాన్సిస్కోలో జరిగిన ఈ విచిత్రమైన పోటీ ప్రస్తుతం సోషల్‌ మీడియాలో వైరల్‌గా మారింది. రోబోటిక్స్‌ కంపెనీ REK ఈ ప్రత్యేక పోరును నిర్వహించింది. మనుషులు వర్చువల్‌ రియాలిటీ ద్వారా హ్యూమనాయిడ్‌ రోబోలను నియంత్రిస్తూ పోటీ పడేలా రూపొందిస్తున్న తమ కొత్త కాంబాట్‌ గేమ్‌లో భాగంగా ఈ ఫైట్‌ను నిర్వహించినట్లు సంస్థ తెలిపింది.
రింగ్‌లోకి దిగిన ‘టెర్మినేటర్‌’ రోబో..
ఈ పోటీలో కంటెంట్‌ క్రియేటర్‌, ఇన్‌ఫ్లుయెన్సర్‌ ఫ్రాంకీ లాపెన్నా రిమోట్‌ కంట్రోల్‌తో నడిచే రోబోతో తలపడ్డారు. భవిష్యత్‌ యుద్ధ యంత్రంలా కనిపించే ఈ రోబో ఫైట్‌ ప్రారంభానికి ముందు రింగ్‌లో కదులుతూ వార్మప్‌ చేయడం కనిపించింది. మ్యాచ్‌ మొదలైన తర్వాత లాపెన్నా రోబోపై పలు పంచ్‌లు విసరగా.. రోబో కూడా బలమైన పంచ్‌లు, కిక్స్‌తో ప్రతిస్పందించింది. ముఖ్యంగా కొన్ని సందర్భాల్లో రోబో వేసిన కిక్స్‌ వల్ల లాపెన్నా రింగ్‌లో వెనక్కి పడిపోయినట్లు వీడియోలో కనిపించింది.
‘హ్యూమన్‌ vs టెర్మినేటర్‌’ అంటూ వైరల్‌..
ఈ పోరును REK సంస్థ తమ తొలి హ్యూమన్‌-వర్సెస్‌-హ్యూమనాయిడ్‌ రోబో ఫైట్‌గా పేర్కొంది. ఈ మ్యాచ్‌కు సంబంధించిన మరిన్ని వీడియోలను విడుదల చేస్తామని వెల్లడించింది. “మొదటి హ్యూమన్‌ వర్సెస్‌ టెర్మినేటర్‌ రోబో ఫైట్‌తో చరిత్ర సృష్టించాం. ఫ్రాంకీ లాపెన్నా తన శక్తిమేర పోరాడారు” అంటూ వీడియోకు క్యాప్షన్‌ ఇచ్చారు.
భవిష్యత్తులో రోబో ఫైట్స్‌?
ఈ వీడియో సోషల్‌ మీడియాలో పెద్ద చర్చకు దారితీసింది. భవిష్యత్తులో మనుషులు నియంత్రించే రోబోలు ప్రొఫెషనల్‌ ఫైటింగ్‌ స్పోర్ట్స్‌లో భాగమయ్యే అవకాశం ఉందా అంటూ పలువురు నెటిజన్లు చర్చిస్తున్నారు.ఒక నెటిజన్‌ స్పందిస్తూ.. “నిజమైన ఫైటర్‌ ఈ రోబోతో పోరాడితే ఎలా ఉంటుందో చూడాలని ఆసక్తిగా ఉంది” అని పేర్కొన్నారు. మరొకరు “రాబోయే రోజుల్లో రోబోలు, మనుషుల మధ్య పోటీలు క్రీడల్లో భాగం కావచ్చు” అంటూ అభిప్రాయపడ్డారు.
హ్యూమనాయిడ్‌ రోబోలు దూకుడుగా ప్రవర్తించిన ఘటనలు గతంలోనూ చర్చకు వచ్చాయి. ఓ ఎలక్ట్రానిక్స్‌ స్టోర్‌లో ఓ రోబోను కస్టమర్‌ నెట్టగా, అది అతడి వైపు కదిలి కిక్‌ చేసేందుకు ప్రయత్నించినట్లు కనిపించిన వీడియో వైరల్‌ అయింది. సిబ్బంది వెంటనే జోక్యం చేసుకుని రోబోను ఆపేశారు.సాంకేతికత వేగంగా అభివృద్ధి చెందుతున్న నేపథ్యంలో భవిష్యత్తులో రోబోలు క్రీడలు, వినోద రంగాల్లో ఎలాంటి పాత్ర పోషిస్తాయన్న ఆసక్తి మరింత పెరుగుతోంది.
