చందౌలీలో హైఅలర్ట్.. గంగా నది నీటిమట్టం పెరుగుదల
కొనసాగుతున్న వర్షాలు.. డ్యామ్ల నుంచి నియంత్రిత నీటి విడుదల
వరద ప్రభావిత ప్రాంతాల్లో సహాయక చర్యలు ముమ్మరం
ఆంధ్రప్రభ, వెబ్ డెస్క్: ఉత్తరప్రదేశ్లోని చందౌలి జిల్లాలో భారీ వర్షాలు, గంగా నది నీటిమట్టం పెరుగుదల, డ్యామ్ల నుంచి నీటి విడుదల నేపథ్యంలో అధికారులు అప్రమత్తమయ్యారు. జిల్లాలో హైఅలర్ట్ ప్రకటించి వరద పరిస్థితులను నిరంతరం పర్యవేక్షిస్తున్నారు. గంగా నది ప్రస్తుతం హెచ్చరిక స్థాయిలో ప్రవహిస్తోందని జిల్లా కలెక్టర్ చంద్ర మోహన్ గార్గ్ తెలిపారు. అయితే నీటిమట్టం చాలా నెమ్మదిగా పెరుగుతోందని, ప్రమాద స్థాయికి చేరుకునే అవకాశం తక్కువగా ఉందని పేర్కొన్నారు. వరద పరిస్థితులను ఎదుర్కొనేందుకు అన్ని ముందస్తు ఏర్పాట్లు చేశామని కలెక్టర్ తెలిపారు. సహాయక చర్యల కోసం వరద సహాయక కేంద్రాలను సిద్ధం చేసి, సిబ్బందిని అప్రమత్తం చేసినట్లు చెప్పారు. కొండ ప్రాంతాల్లో కురుస్తున్న వర్షాల కారణంగా వరద నీరు జిల్లాకు చేరుతోందని, ఎలాంటి అంతరాయం కలగకుండా డ్యామ్ల నుంచి నీటిని అత్యంత నియంత్రిత పద్ధతిలో విడుదల చేస్తున్నామని వివరించారు. గరై నది పరివాహక ప్రాంతాల్లోకి, అరౌరా ప్రాంతం నుంచి వచ్చిన వరద నీటి కారణంగా సమీపంలోని 10 నుంచి 12 గ్రామాల్లోని కొన్ని ప్రాంతాలు నీట మునిగాయని అధికారులు తెలిపారు. అయితే నదిలో నీటి ప్రవాహం కొనసాగుతూ ఉండటంతో వరద నీరు క్రమంగా తగ్గుతోందని చెప్పారు. ప్రభావిత వ్యవసాయ భూముల్లో నష్టాన్ని అంచనా వేసేందుకు అధికారులు సర్వేలు నిర్వహిస్తున్నారని కలెక్టర్ వెల్లడించారు. ప్రజలకు ఎలాంటి ఇబ్బందులు తలెత్తకుండా అన్ని శాఖల సమన్వయంతో చర్యలు చేపడుతున్నట్లు తెలిపారు.
