Dorothy Movie Review: ఆలోచింపజేసే సాహసోపేత ప్రయత్నం!
ఆంధ్ర‌ప్ర‌భ, వెబ్ డెస్క్: తమిళనాట విడుదలైన ఇటీవల కాలంలో విమర్శకుల ప్రశంసలు పొందిన చిత్రం ‘డోరతీ’ (Dorothy Movie Review). కీర్తి సురేశ్, సనంత్, రిషికాంత్ ప్రధాన పాత్రల్లో నటించిన ఈ చిత్రాన్ని దర్శకుడు కార్తిక్‌ సుబ్బరాజ్‌ తెరకెక్కించారు. ఈ వైవిధ్యమైన చిత్రాన్ని టాలీవుడ్ కథానాయకుడు రానా దగ్గుబాటి తెలుగు ప్రేక్షకుల ముందుకు తీసుకువచ్చారు. మరి ఈ సినిమా అందించే అనుభూతి ఎలా ఉందో చూద్దాం.
కథా నేపథ్యం..
తమిళనాడులోని ఒక పల్లెటూరి నేపథ్యంలో సాగే కథ ఇది. సుబ్బు (సనంద్‌), కార్తి (రిషికాంత్) చిన్నతనం నుంచి ప్రాణ స్నేహితులు. సమాజంలో జరిగే కొట్లాటలకు అలవాటు పడి పెద్దయ్యాక రౌడీలుగా జీవిస్తుంటారు. అయితే వయసు పెరిగే కొద్దీ తనలో స్త్రీ లక్షణాలు ఉన్నాయని గుర్తించిన సుబ్బు, పురుషాధిక్య సమాజం ఇచ్చే అవమానాలకు భయపడి పైకి మగవాడిలా నటిస్తుంటాడు.
ఇలాంటి సమయంలో డోరతీ (కీర్తి సురేశ్) సుబ్బు ఇంట్లోకి వదినగా అడుగుపెడుతుంది. సుబ్బుతో ఆమెకు మంచి అనుబంధం ఏర్పడుతుంది. అయితే అనూహ్యంగా డోరతీ మరణించడంతో సుబ్బు జీవితంలో పెద్ద మలుపు తిరుగుతుంది. అతను తీసుకున్న ఒక సంచలన నిర్ణయం వల్ల స్నేహితులైన సుబ్బు, కార్తిల మధ్య వైరంగా మారుతుంది. చివరికి వీరి స్నేహ ప్రయాణం ఏ తీరానికి చేరింది అనేది మిగతా కథ.
విశ్లేషణ.. నటీనటుల ప్రదర్శన
సమాజంలోని అసమానతలను ప్రశ్నించే దర్శకుడు కార్తిక్‌ సుబ్బరాజ్‌, ఈసారి లింగ వివక్ష, పితృస్వామ్య వ్యవస్థ మరియు ట్రాన్స్‌జెండర్‌ కమ్యూనిటీ పట్ల సమాజంలో ఉన్న చిన్నచూపును ప్రధానాంశాలుగా ఎంచుకున్నారు.
కథనం, తీరు: నాన్-లీనియర్ స్క్రీన్‌ప్లేతో సాగే కథనం కొన్ని చోట్ల గందరగోళంగా, మందకొడిగా సాగుతుంది. ప్రథమార్థంలో డోరతీ ప్రవేశం, విరామ సన్నివేశాలు ఆకట్టుకోగా.. ద్వితీయార్థంలో ఎమోషన్స్‌ భావోద్వేగానికి గురిచేస్తాయి. అయితే కొన్ని సన్నివేశాలు నాటకీయంగా కాకుండా ఉపన్యాసాల్లా అనిపిస్తాయి. డోరతీ చావుకి గల పూర్తి కారణాలను చూపించకపోవడం కాస్త నిరాశపరుస్తుంది.
నటీనటులు: ఈ చిత్రానికి సనంత్ నటన ప్రధాన బలం. ఓ ట్రాన్స్‌జెండర్‌గా మారే క్రమంలో ఆయన చూపించిన హావభావాలు అద్భుతం. కార్తిగా నటించిన రిషికాంత్ కూడా జీవించారు. కీర్తి సురేశ్ పాత్ర చిన్నదైనా కథను కీలక మలుపు తిప్పుతుంది. తండ్రి పాత్రలో ముత్తుకుమార్‌ తన మార్కు ప్రదర్శన ఇచ్చారు.
సాంకేతిక వర్గం: ఇళయరాజా నేపథ్య సంగీతం సినిమా ఎమోషన్‌ను మరో స్థాయికి తీసుకెళ్లింది. సినిమాటోగ్రఫీ 90ల కాల నాటి వాతావరణాన్ని అద్భుతంగా ఆవిష్కరించింది.
బలాలు & బలహీనతలు
బలాలు:
సమాజానికి అవసరమైన సాహసోపేతమైన కథాంశం
సనంత్, రిషికాంత్‌ల అద్భుత నటన
ఇళయరాజా సంగీతం, నేపధ్య సంగీతం
బలహీనతలు:
గందరగోళ పరిచే నాన్-లీనియర్ స్క్రీన్‌ప్లే
నిమ్మదిగా సాగే కథన వేగం
అందరికీ సులభంగా జీర్ణమవ్వని బోల్డ్‌ కంటెంట్‌
‘డోరతీ’ (Dorothy Movie Review) అందరికీ నచ్చే సాధారణ వ్యాపారాత్మక సినిమా కాదు. సమాజపు వివక్షతపై ఆలోచింపజేసే, భావోద్వేగాలతో కూడిన ఒక విభిన్నమైన ప్రయత్నం!
