104. ఘడియల్ రెంటికొ, మూటికో, ఘడియకో, కాదేని నేడెల్లియో
కడ నేడాదికొ యెన్నడో యెరుగ మీకాయంబు లీ భూమిపై
బడగా నున్నవి, ధర్మమార్గ మొకటిం బాటింపరీ మానవుల్
చెడుగుల్ నీ పదభక్తియుం దెలియరో శ్రీకాళహస్తీశ్వరా!
ప్రతిపదార్థం: శ్రీకాళహస్తీశ్వరా!, ఈ కాయంబులు- ఈ శరీరాలు, ఘడియకో- ఒక్క ఘడియకు గాని, ఘడియల్ రెంటికొ- రెండు ఘడియల కాలానికి గాని, మూటికో- మూడు ఘడియలకి గాని, కాదు- ఏని- కాక పోతే, నేడు- ఈ రోజో, ఎల్లి- ఓ-రే పో కడన్- చివరకు, ఏడాదికి- ఓ- ఒక సంవత్సరానికో, భూమిపై- ఈ నేల మీద, పడన్- కాన్-పడిపోవటానికి సిద్ధంగా, ఉన్నవి- ఉన్నాయి, ఎన్నడో- ఎప్పుడో మాత్రం, ఎఱుగము- తెలియము, ఈ మానవుల్- ఈ మనుషులు, చెడుగుల్- దుష్టులు, ధర్మమార్గము- ధర్మమైన దారిని, ఒకటిన్- ఒక్కదానిని కూడ, పాటింపరు- అనుసరించరు, నీ పదభక్తియున్- నీ పాదముల యందలి భక్తిని కూడ, తెలియరు- ఓ- తెలుసుకోరు కదా!
తాత్పర్యం: శ్రీకాళహస్తీశ్వరా! ఈ శరీరాలు ఒక ఘడియకో, రెండుఘడియలకో, మూడుఘడియల కో, కాకుంటే ఈ రోజో, రేపో, అదీ కాకుంటే ఒక ఏడాదికో నేలబడక తప్పదు. (మరణం తథ్యం) కాని, ఎప్పుడో మాత్రం తెలియదు. ఈ సంగతి తెలిసి కూడా దుష్టవర్తనులైన మానవులు ధర్మమార్గంలో నడవరు, నీ పదభక్తి నైనా కలిగి ఉండరు. కారణం తెలియదు.
విశేషం: అస్థిరమైన శరీరాలని నమ్మి, వాటి పోషణకై చెడుమార్గాలలో నడిచే మానవులు శాశ్వతమైన శివపాదభక్తిని మాత్రం తెలియకపోవటం ఎంతో విచారకరమైన సంగతి అని ధూర్జటి వేదన.
