37. తనువే నిత్యముగా నొనర్పు, మది లేదా, చచ్చిజన్మింపకుం
డ నుపాయంబుఘటింపు మా గతులు రెంటన్నేర్పు లేకున్న లే
దని నా కిప్పుడ చెప్పు, చేయగల కార్యంబున్నసంసేవ( జే
సి నినుంగాంచెద( గాక కాలముననోశ్రీకాళహస్తీశ్వరా!
ప్రతిపదార్థం : శ్రీకాళహస్తీశ్వరా!, తనువు – ఏ – శరీరమే, నిత్యము – కాన్ -శాశ్వతం అయ్యేట్టు, ఒనర్పుము – చేయ వలసినది. అది – ఆ విధంగా, లేదా – కుదరనట్లయితే, చచ్చి – చనిపోయిన తర్వాత, జన్మింపక – ఉండన్ – పుట్ట కుండగ, ఉపాయంబు – ఘటింపుము – ఏర్పాటు చెయ్యవలసినది. ఆ గతులు – ఆ పద్ధతులు, రెంటన్ -రెండింటిలో, నేర్పు -నైపుణ్యం, లేక -ఉన్న్స లేనట్లయితే, లేదు – అని – నేర్పు లేదని, నాకు -నాకు, ఇప్పుడు – అ -ఇప్పుడే, చెప్పు్స చెప్ప వలసినది. చేయన్ – కల- చేయ గలిగిన, కార్యంబు -పని, ఉన్న -ఉన్నట్లయితే, కాలమునన్ -(తగిన) సమయంలో, చేసి – నిర్వర్తించి, సంసేవన్ – నిన్ను చక్కగా సేవించుకోవటం ద్వారా, నిన్నున్ -నిన్ను, కాంచెదన్ – కాక -దర్శిస్తాను. ( నిన్ను చేరుకుంటాను).
తాత్పర్యం: శ్రీకాళహస్తీశ్వరా! శరీరమే శాశ్వతమయ్యేట్టుగా చేయి. లేదా, చనిపోయిన తర్వాత మళ్ళీ పుట్టకుండా చేయి. ఈ రెండు నీ వల్ల కాకుంటే ఆ సంగతి నాకిప్పుడే చెప్పు. నేను చేయగల పని సకాలంలో నిర్వర్తించి, నిన్ను చక్కగా సేవించుకున్న దాని ఫలితంగా నిన్ను దర్శిస్తాను.
విశేషం: జీవితం అశాశ్వతంఅని, చనిపోయిన జీవి మళ్ళీ జన్మించక తప్పదని అందరికీ తెలుసు. అది సృష్టిధర్మం. దాన్ని తప్పించటం ఒక్క పరమేశ్వరుడికే సాధ్యం. కనుకనే అ శివుణ్ణి ప్రార్థించటం. ఒకవేళ శివుడికి కూడా సాధ్యపడక పోతే, అది శివభక్తుడికి సాధ్య మవుతుంది–శివానుగ్రహం కారణంగా. అది లభ్యం కాక పోయినా భక్తుడు బాధ పడడు. అన్నిటినీ మించింది శివదర్శనం. అది లభిస్తే ఇంకేమీ కోరడు శివభక్తుడు.
