నేడు ముచ్చింతల్‌కు ఏపీ సీఎం జగన్‌

ఆంధ్రప్రదేశ్‌ ముఖ్యమంత్రి వైఎస్‌ జగన్‌మోహన్‌ రెడ్డి ఈరోజు హైదరాబాద్‌కు రానున్నారు. శంషాబాద్‌ ముచ్చింతల్‌లో జరుగుతున్న శ్రీరామానుజ చార్యుల సహస్రాబ్ది ఉత్సవాల్లో సీఎం జగన్‌ పాల్గొనబోతున్నారని ఏపీ ప్రభుత్వం ఆదివారం ఒక ప్రకటనలో తెలిపింది. సోమవారం మధ్యాహ్నం 3.50 గంటలకు గన్నవరం విమానాశ్రయం నుంచి బయలుదేరి సాయంత్రం 4.30 గంటలకు శంషాబాద్‌కు ఆయన చేరుకుంటారు. అక్కడి నుంచి చినజీయర్‌ స్వామి ఆశ్రమానికి జగన్‌ చేరుకుంటారు. ఆ తర్వాత శ్రీరామనగరంలోని శ్రీరామానుజ సహస్రాబ్ది ఉత్సవాల్లో సీఎం జగన్‌ పాల్గొంటారు. ఈ కార్యక్రమం అనంతరం తిరిగి రాత్రి 8 గంటలకు శంషాబాద్‌ ఎయిర్‌ పోర్టు నుంచి బయలుదేరి గన్నవరం చేరుకుంటారు. రాత్రి 9.05 గంటలకు తాడేపల్లిలోని తన నివాసానికి సీఎం చేరుకుంటారు.