శ్రీమన్నారాయణుడు జగత్తును సృష్టించాలి అనుకున్నప్పుడు రజోగుణాన్ని తీసుకొని బ్రహ్మ అన్న నామంతో సృష్టి చేస్తాడు. రక్షించాలి అనుకున్నప్పుడు సత్వగుణాన్ని తీసుకొని విష్ణువు అన్న నామంతో రక్షిస్తాడు. సంహరించాలి అనుకున్నప్పుడు తమోగుణాన్ని తీసుకొని రుద్ర నామం తో సంహరిస్తాడు. ఈ విధంగా సృష్టి, స్థితి, లయములను బ్రహ్మా, విష్ణు, మహేశ్వరుల పేర్లతో రజో, సత్వ, తమో గుణములతో ప్రవర్తింప చేసేవాడు పరమాత్మ శ్రీమన్నారాయణుడు ఒక్కడే. మూడు గుణాలతో, మూడు రూపాలతో, మూడు పేర్లతో, మూడు కార్యాలు చెసినా సూక్ష్మ దృష్టితో చూస్తే ఈ మూడు రక్షణకే. అవసరమైనపుడు సృష్టించడం, అవసరం లేని దాన్ని తప్పించడం, ఈ రెండూ రక్షణలో భాగమే. అందుకే అన్ని పురాణాలు, ఇతిహాసాలు, ధర్మ శాస్త్రాలు రక్షణ గురించే వివరించాయి. పరమాత్మ శ్రీమన్నారాయణుడు లోకాలను రక్షించడానికి సుర, నర, తిర్యక్‌(పశువులు) రూపాలలో అవతరించాడు. ఈ అవతారాలలో అనంత కోటి బ్రహ్మాండాలను రక్షించాడు. క్షీరసాగరమున ఆదిశేషునిపై పడుకుని ఉన్న స్వామి ” సహస్ర శీర్ష పురుష: సహస్రాక్షా: సహస్రపాత్‌” అని చెప్పినట్టుగా పరమాత్మ విశ్వరూపమే అన్ని అవతారాలకు ఆధారం. స్వామి అవతారాలు అనంతాలైనా దశావతారులు ప్రసిద్ధం కాగా ప్రధానంగా పురాణాల్లో పేర్కొనబడినవి 24 అవతారాలు. అందులో మొదటిది సనకాది ఋషులు. ఈ వరసలో ఈ అవతారాల వైశిష్ట్యం, వైభవం, విశేషాలు, ధర్మ సూక్ష్మాలు తెలుసుకోదగినవి.
…శ్రీమాన్‌ డాక్టర్‌ కందాడై రామానుజాచార్యులు
వాయిస్‌ ఓవర్‌ : గూడూరు శ్రీలక్ష్మి