112.
తనయుం గాంచి, ధనంబు నించి, దివిజస్థానంబు గట్టించి,
విప్రున కుద్వాహము చేసి, సత్కృతికి పాత్రుండై, తటాకంబు
నేర్పున ద్రవ్వించి, వనంబు పెట్టి మననీ, పోలేడు నీ సేవ
చేసిన పుణ్యాత్ముడు పోవు లోకమునకున్ శ్రీకాళహస్తీశ్వరా!
ప్రతిపదార్థం:
శ్రీకాళహస్తీశ్వరా!, తనయున్ – కుమారుణ్ణి, కాంచి – పొంది, ధనంబు – ధనము / డబ్బు, నించి – నింపి/ నిండుగా సంపాదించి, దివిజస్థానంబు – దేవాలయం, కట్టించి – నిర్మాణం చేసి, విప్రునకు – బ్రాహ్మణుడికి, ఉద్వాహము చేసి – పెండ్లిచేసి, సత్కృతికి – మంచికావ్యానికి, పాత్రుడు – ఐ – అర్హుడై (అంకితం పుచ్చుకునే అర్హత కలవాడై), నేర్పున – కౌశలంతో, తటాకంబు – చెఱువును, త్రవ్వించి్స త్రవ్వునట్లు చేసి, వనంబు పెట్టి – తోటలను ఏర్పాటు చేసి (మొక్కలు నాటి, తోటలు పెంచి), మననీ – పేరొంది బ్రతుకును గాక, నీసేవ చేసిన – నిన్ను కొలిచిన, పుణ్య – ఆత్ముడు – పుణ్యశీలి, పోవులోకమునకు – చేరే ఉత్తమలోకానికి, పోలేడు – వెళ్ళలేడు.
తాత్పర్యం:
శ్రీకాళహస్తీశ్వరా! పుత్రసంతానం, ధనసంపద, దేవమందిరనిర్మాణం, బ్రాహ్మణుడికి వివాహం జరిపించటం, మంచి కావ్యాన్ని అంకితం పుచ్చుకోవటం, చెరువుని తవ్వించటం, ఉద్యానవన నిర్మాణం – అనే సప్తసంతానాలని పొందిన పుణ్యాత్ముడు కూడా నీ భక్తుడు పోయే పుణ్యలోకాలకి పోలేడు.
విశేషం:
సప్తసంతానాలు పుణ్యప్రదాలు. పుణ్యకార్యాల వల్ల లభించేది స్వర్గలోకప్రాప్తి. పుణ్యం కర్చు అయినాక మళ్లీ భూలోకం చేరక తప్పదు. “క్షీణేపుణ్యే మర్త్యలోకం వింశతి.” శివభక్తి అనేది ఒక్కటి ఉంటే ఈ పుణ్యకార్యాల కన్న ఘనం. శివలోకప్రాప్తి శివభక్తి ఉంటే మాత్రమే లభిస్తుంది.
డాక్టర్ అనంతలక్ష్మి