చిత్ర యూనిట్ కు అభిమానుల స్వాగతం
జన్నారం, నవంబర్ 23 (ఆంధ్రప్రభ): మంచిర్యాల జిల్లా జన్నారం మండల కేంద్రంలోని శ్రీ రాఘవేంద్ర థియేటరులో కేశవ చంద్ర రమావత్ (కేసీఆర్) చిత్ర యూనిట్ సందడి చేసింది. ఇక్కడికి విచ్చేసిన చెత్త యూనిట్ కు స్థానిక థియేటర్ యజమాన్యం, అభిమానులు స్వాగతం పలికారు. దేశవ్యాప్త విడుదలలో భాగంగా ఈ చిత్రం శనివారం ఆ సినిమా థియేటర్ లో ఎంతో అట్టహాసంగా కేసీఆర్ చిత్ర హీరో జబర్దస్త్ రాకింగ్ రాకేష్, హీరోయిన్ అనన్య కృష్ణన్, ఖానాపూర్ సెగ్మెంట్ బీఆర్ఎస్ పార్టీ ఇంచార్జి భూక్య జాన్సన్ నాయక్, బీఆర్ఎస్ రాష్ట్ర యువ నాయకులు బాదావత్ పూర్ణచంద్రనాయక్, మాజీ జెడ్పీటీసీ చంద్రశేఖర్ విడుదల చేశారు.
ఈ సందర్భంగా హీరో మాట్లాడుతూ….. ఈ చిత్రాన్ని తెలంగాణ ప్రజలకు, రాష్ట్ర మాజీ ముఖ్యమంత్రి కె.చంద్రశేఖర్ రావుకు అంకితమిస్తున్నామన్నారు. ఈ చిత్రాన్ని తెలంగాణ ప్రాంతంలో ప్రేక్షకులు ఎంతో ఆదరిస్తారని ఆయన ఆశాభావం వ్యక్తం చేశారు. కేసీఆర్ తెలంగాణకు చేసిన సేవలను ప్రతిబింబించేలాగా చిత్రం ఉంటుందని ఆయన తెలిపారు. ముందుగా అభిమానుల కోలాహ‌లం మధ్య హీరో మండల కేంద్రంలోని తెలంగాణ తల్లి విగ్రహానికి పూలమాలవేసి నివాళులర్పించి, స్థానిక ప్రధాన రహదారి మీదుగా ఊరేగింపుగా థియేటర్ వరకు ఇచ్చేశారు.
ఈ కార్యక్రమంలో గ్రీన్ ట్రీ ప్రొటెక్షన్ నిర్వాహకులు, అదిలాబాద్ మాజీ జెడ్పీ చైర్మన్ రాథోడ్ జనార్ధన్, మండల కో ఆప్షన్ మాజీ మున్వర్ అలీ, బంజారా సంఘం మండల అధ్యక్షుడు అజ్మీర భీమ్లాల్ నాయక్, నేతలు ఫజల్ ఖాన్, బి.శ్రీనివాస్ నాయక్, సంతోష్ నాయక్, రాములునాయక్, బీఆర్ఎస్ పార్టీ మండల ప్రధాన కార్యదర్శి సులువ జనార్ధన్, అభిమానులు, నేతలు, తదితరులు పాల్గొన్నారు.
