కార్తీక్‌ రాజు ప్రధాన పాత్రలో తెరకెక్కుతున్న కొత్త సినిమా అధర్వ. క్రైమ్‌ థ్రిల్లర్‌ కథతో తీస్తున్నారు. మ‌హేష్‌ రెడ్డి దర్శకుడు. సుభాష్‌ నూతలపాటి నిర్మాణ బాధ్యతలు చేపట్టారు. తెలుగు, తమిళ, కన్నడ, మలయాళ భాషల్లో ఏకకాలంలో ఈ సినిమాను రూపొందిస్తున్నారు. తాజాగా మాస్‌ మహారాజా రవితేజ చేతులు మీదుగా ఈ సినిమా తెలుగు టైటిల్‌ లోగో, మోషన్‌ పోస్టర్‌ విడుదల చేశారు. నేను నమ్మిన సత్యం, వెతికే లక్ష్యం, దొరకాల్సిన సాక్ష్యం చేధించేవరకు ఈ కేసును వదిలిపెట్టను సార్‌.. అంటూ హీరో చెబుతున్న డైలాగ్స్‌ ఈ మోషన్‌ పోస్టర్‌ లో హైలైట్‌ అయ్యాయి. ది సీకర్‌ ఆఫ్‌ ది ట్రూత్‌ అనే ట్యాగ్‌ లైన్‌తో ఈ సినిమాను ప్రేక్షకుల ముందుకు తీసుకొస్తున్నారు.
ఇప్పటివరకు వచ్చిన క్రైమ్‌ థ్రిల్లర్‌ సినిమాలతో పోల్చితే ఈ సినిమా డిఫరెంట్‌ అనుభూతి కలిగిస్తుందని తాజాగా వదిలిన మోషన్‌ పోస్టర్‌ స్పష్టం చేస్తోంది. అదేవిధంగా డీజే టిల్లు, మేజర్‌ లాంటి సినిమాలకు మ్యూజిక్‌ అందించిన శ్రీచరణ్‌ పాకాల ఈ సినిమాకు బాణీలు కట్టడం విశేషం. ఆయన మ్యూజిక్‌ సినిమాకు మేజర్‌ అసెట్‌ అంటున్నారు మేకర్స్‌. ఈ సినిమాకు చరణ్‌ మాధవనేని సినిమాటోగ్రఫీ అందిస్తున్నారు. చిత్రంలో సిమ్రాన్‌ చౌదరి, ఐరా, అరవింద్‌ కృష్ణ, కబీర్‌ సింగ్‌ దుహాన్‌, కల్పిక గణేష్, గగన్‌ విహారి, రామ్‌ మిట్టకంటి, కిరణ్‌ మచ్చ, మరిముత్తు, ఆనంద్‌, విజయరామరాజు తదితరులు ముఖ్యపాత్రలు పోషించారు.