గ్లోబల్ స్టార్ జూనియర్ ఎన్టీఆర్ ప్రస్తుతం కొరటాల శివ దర్శకత్వంలో ‘దేవర’ అనే సినిమా చేస్తున్నారు. ఈ సినిమాలో బాలీవుడ్ బ్యూటీ జాన్వీ కపూర్ హీరోయిన్ గా నటిస్తోంది. ఇక సైఫ్ అలీ ఖాన్ పవర్ ఫుల్ ప్రతినాయకుడి పాత్రలో కనిపించనున్నారు. సుమారు రూ.300 కోట్ల బడ్జెట్ తో తెర‌కెక్కుతున్న ఈ మూవీ షూటింగ్ శరవేగంగా జ‌రుగుతోంది.. ఈ మూవీ ఇప్పటికే సగానికి పైగా చిత్రీకరణ పూర్తి చేసుకున్నట్లు తెలుస్తోంది. మరోవైపు సినిమాకు సంబంధించిన వీఎఫ్ఎక్స్ పనులు కూడా మొదలైనట్లు సమాచారం.
కాగా, ‘దేవర’ మూవీకి సంబంధించి ఓ ఆసక్తికర విషయం వెలుగులోకి వచ్చింది. ఈ మూవీకి సంబంధించి డిజిటల్ రైట్స్ ప్రముఖ ఓటీటీ సంస్థ నెట్‌ఫ్లిక్స్ రికార్డు ధరకు దక్కించుకున్నట్టు తెలుస్తోంది. ఈ యాక్ష‌న్ డ్రామా మూవీని ఏకంగా రూ.150 కోట్లతో నెట్‌ఫ్లిక్స్ సొంతం చేసుకున్న‌ట్టు సమాచారం. దాంతో పాటు ఆడియో రైట్స్ ని టీ సిరీస్ రూ.25 కోట్లతో దక్కించుకున్నట్టు తెలుస్తోంది. దీంతో, ఈ న్యూస్ టాలీవుడ్ లో హాట్ టాపిక్ గా మారింది. ‘దేవర’ షూటింగ్ కంప్లీట్ కాకముందే బడ్జెట్ లో సంగం డబ్బులు వచ్చేయానే టాక్ న‌డుస్తోంది.
ఇక, ‘దేవర’ సినిమా విడుదలకు సంబంధించి మేకర్స్ ఇప్పటికే డేట్ ఫిక్స్ చేశారు. వచ్చే ఏడాది (2024) ఏప్రిల్ 5న ప్రపంచ వ్యాప్తంగా ఈ మూవీని విడుదల చేయనున్నారు. తెలుగుతో పాటు 5 భారతీయ భాషల్లో ఈ సినిమా విడుదల కానుంది. ఈ మూవీకి అనిరుధ్ రవిచందర్ సంగీతం అందిస్తుండ‌గా.. ఎన్టీఆర్ ఆర్ట్స్‌, యువసుధ ఆర్ట్స్‌ పతాకాలపై హరికృష్ణ, మిక్కిలినేని సుధాకర్ ఈ సినిమాని నిర్మిస్తున్నారు.