నిర్మాత బెల్లంకొండ సురేష్ కుమారుడు, బెల్లంకొండ సాయి శ్రీనివాస్ సోదరుడు గణేష్ స్వాతిముత్యం అనే ఫ్యామిలీ ఎంటర్‌టైనర్‌తో తొలిసారి వెండితెర‌కు ప‌రిచ‌యంకాబోతున్నాడు. లక్ష్మణ్ కె.కృష్ణ రచన, దర్శకత్వం వహించిన ఈ సినిమాలో వర్ష బొల్లమ్మ హీరోయిన్‌గా నటిస్తోంది. డీజే టిల్లు మూవీని నిర్మించిన సితార ఎంటర్‌టైన్‌మెంట్స్ ఈ సినిమాని నిర్మిస్తోంది. కాగా, స్వాతిముత్యం షూటింగ్ పూర్తికావ‌డంతో.. పోస్ట్ ప్రొడక్షన్ పనులు శరవేగంగా జరుగుతున్నాయి. నరేష్, రావు రమేష్, సుబ్బరాజు, వెన్నెల కిశోర్, హర్షవర్ధన్, పమ్మి సాయి, గోపరాజు రమణ, శివ నారాయణ, ప్రగతి, సురేఖావాణి ఈ సినిమాలో కీలక పాత్రలు పోషిస్తున్నారు.
కాగా, లెటెస్ట్‌గా ఈ సినిమాని ఆగస్టు 13న విడుదల చేయ‌నున్న‌ట్టు ప్రకటించారు నిర్మాతలు. దీనికి సంబంధించి ఓ పోస్ట‌ర్ ను కూడా రిలీజ్ చేశారు. రిలీజ్ డేట్ అనౌన్స్‌మెంట్ పోస్టర్‌లో హీరో, హీరోయిన్ స్కూటీ మీద తిరుగుతూ సరదాగా గడుపుతున్నారు. ప్రేమ, పెళ్లి, ఆధునిక సంబంధాల వంటి అంశాలతో ఈ చిత్రం ఉంటుందని సమాచారం.
స్వాతి ముత్యం చిత్రానికి మహతి స్వర సాగర్ సంగీతం అందించారు. అవినాష్ కొల్లా ఆర్ట్ డైరెక్టర్. సూర్యదేవర నాగవంశీ నిర్మాతగా, పీడీవీ ప్రసాద్ సమర్పకుడిగా వ్యవహరిస్తున్నారు. ఈ చిత్ర కథానాయిక వర్ష బొల్లమ్మ చివరిగా తెలుగులో రాజ్ తరుణ్‌తో కలిసి స్టాండ్ అప్ రాహుల్‌లో నటించింది.
లోక‌ల్ టు గ్లోబ‌ల్.. ప్రభన్యూస్ కోసం ఫేస్‌బుక్‌, ట్విట‌ర్, టెలిగ్రామ్ పేజీల‌ను ఫాలో అవ్వండి.