దేశీయ ఆటోమొబౖౖెల్‌ కంపెనీ బజాజ్‌ ఆటో, బ్రిటిష్‌ మోటార్‌ సైకిల్‌ బ్రాండ్‌ ట్రయంఫ్‌తో కలిసి డెవలప్‌ చేసిన రెండు కొత్త బైక్‌లను మన దేశ మార్కెట్‌లో విడుదల చేసింది. ట్రయంఫ్‌ స్పీడ్‌ 400, స్క్రాంబ్ల ర్‌400 ఎక్స్‌ పేరుతో ఈ రెండు బైక్‌లను మార్కెట్‌లో విడుదల చేసింది. లండన్‌లో గత వారం వీటిని మార్కెట్‌లో విడుదల చేశారు. ట్రయంఫ్‌ స్పీడ్‌ 400 ధర 2.33 లక్షలుగా నిర్ణయించారు. అయితే ఈ ధర తొలి 10వేల కస్టమర్లకు మాత్రమేనని కంపెనీ తెలిపింది. స్క్రాంబ్లర్‌ 400ఎక్స్‌ ధరను మాత్రం కంపెనీ ప్రకటించలేదు. స్పీడ్‌ 400 బైక్‌ను ఈ నెల నుంచే అమ్మకాలు ప్రారంభిస్తారు. స్క్రాంబ్లర్‌ 400 ఎక్స్‌ బైక్‌ను మాత్రం అక్టోబర్‌ నుంచి అమ్మకాలు ప్రారంభించనున్నట్లు బజాజ్‌, ట్రయంఫ్‌ తెలిపాయి.
ఈ రెండు కొత్త బైక్‌లు 398 సీసీ ఇంజిన్‌తో వస్తున్నాయి. లిక్విడ్‌కూల్డ్‌, డ్యూయల్‌ ఓవర్‌ హెడ్‌ క్యామ్‌షాప్ట్‌ సింగిల్‌ సిలిండర్‌తో వస్తున్న ఈ ఇంజిన్‌, 40 పీఎస్‌ పవర్‌ను, 39.5 నానోమీటర్‌ పీక్‌ టార్క్‌ను ఉత్పత్తి చేస్తుంది. వీటిలో 6 స్పీడ్‌ గేర్‌ బాక్స్‌ను అమర్చారు. లీటర్‌కు 28 కిలోమీటర్ల మైలేజీ వస్తుందని కంపెనీ తెలిపింది. డ్యూయల్‌ ఛానెల్‌ ఏబీఎస్‌, ఎల్‌ఈడీ లైటింగ్‌ వంటివి ఈ బైక్స్‌లో ఉన్నాయి. ఈ బైక్‌లు రాయల్‌ ఎన్‌ఫీల్డ్‌ బైక్‌లకు గట్టి పోటీ ఇవ్వగలవని భావిస్తున్నారు. ఇండియాలో ట్రయంఫ్‌ బిజినెస్‌ను బజాజ్‌ ఆటో తీసుకుంది. ఈ రెండు కంపెనీల మధ్య ఒప్పందం మేరకు ఇండియాలో ఈ బైక్‌లు బజాజ్‌ ట్రయంఫ్‌గా వస్తున్నాయి.