ఆర్కిటిక్‌ ప్రాంతంలో ఉత్పత్తి అయ్యే ముడిచమురుకు ఇప్పుడు ఆసియా దేశాలు ప్రధాన మార్కెట్‌గా మారాయి. యూరప్‌ దేశాలు విధించిన ఆంక్షల నేపథ్యంలో, రష్యా ఇక్కడి చమురును భారత్‌, చైనాలకు పంపుతోంది. ఉక్రెయిన్‌ యుద్ధం మొదలైన తర్వాత ఈ సరఫరాలు గణనీయంగా పెరిగాయి. ఆర్కిటిక్‌ గ్రేడ్‌లు, ఆర్కో, ఆర్కో/నోవీపోర్ట్‌, వరండేలు సాధారణంగా తూర్పు దేశాలకు వెళ్లవు.
కానీ యూరోపియన్‌ యూనియన్‌, జి7 దేశాలు, ఆస్ట్రేలియా డిసెంబర్‌లో రష్యన్‌ చమురు ధరలపై సీలింగ్‌ విధించడంతో తన ముడిచమురు ఉత్పత్తులకు కొత్త మార్కెట్లను రష్యా అన్వేషిస్తోందని సింగపూర్‌కు చెందిన ఓ వ్యాపారి చెప్పారు. నవంబర్‌లో రికార్డు స్థాయిలో 6.67 మిలియన్‌ బ్యారల్స్‌, డిసెంబర్‌లో 4.1 మిలియన్‌ బ్యారల్స్‌ చమురు ఆర్కిటిక్‌ నుంచి భారత్‌కు చేరాయి.