ప్రముఖ ఇ-కామర్స్‌ సంస్థ అమెజాన్‌ మరోసారి ఉద్యోగులను తొలగించింది. వాయిస్‌ అసిస్టెంట్‌ అలెక్సాలో వందలాది మంది ఉద్యోగులను తొలగిస్తున్నట్లు ప్రకటించింది. కృత్రిమ మేథపై ఆ సంస్థ ఫోకస్‌ పెట్టినందున ఈ తొలగింపులు చేపట్టినట్లు అమెజాన్‌ తెలిపింది. దీనిపై అలెక్సా, ఫైర్‌ టీవీ విభాగాల వైస్‌ ప్రెసిడెంట్‌ డేనిల్‌ రౌష్‌ ఉద్యోగులకు లేఖ రాశారు. మారుతున్న వ్యాపార ప్రాధాన్యతల్లో భాగంగా మరింత మెరుగ్గా రాణించే ప్రయత్నంలో కొన్నింటిలో మార్పులు చేపడుతున్నామని లేఖలో పేర్కొన్నారు.
ఇందులో భాగంగా ఉత్పాదక పెంచడం, ఏఐపై దృష్టి పెట్టడం వంటివి ఉన్నాయని తెలిపారు. ఈ క్రమంలోనే వందలాది మంది ఉద్యోగాలను తీసివేస్తున్నట్లు ఈ లేఖలో ఆయన ఉద్యోగులకు తెలిపారు. ఎంతమందిని తొలగిస్తున్నది మాత్రం వెల్లడించలేదు. అమెజాన్‌ తాజా నిర్ణయంతో అమెరికా, కెనడా, భారత్‌లోని ఉద్యోగులపై ఈ ప్రభావం పడుతుంది. ఏఐ టూల్స్‌పై ఆధారపడటం ఇటీవల కాలంలో పెరిగింది.
ఏఐ ద్వారా తమ ఉత్పాదకత పెంచుకునేందుకు కంపెనీలు ప్రయత్నిస్తున్నాయి. అమెజాన్‌ కూడా కొన్ని నెలలుగా ఏఐని వినియోగించుకుంటోంది. ఇందులో భాగంగాన ఈ సంవత్సరం ఇప్పటికే అమెజాన్‌ సంస్థ గత ఏడాది చివర్లో, ఈ ఏడాది మొదల్లో 27వేలకు పైగా ఉద్యోగులను తొలగించింది. గేమింగ్‌, మ్యూజిక్‌ విభాగాల్లోనూ ఇటీవల కొంతమందిని తొలగించింది. తాజాగా అలెక్సాలోనూ ఉద్యోగలకు ఇంటికి పంపించింది.