తిరుపతి : దాదాపు 46,000 మందికి పైగా ప్రసూతి, గైనకాలజీ నిపుణులకు ప్రాతినిధ్యం వహిస్తున్న, భారతదేశంలోని అతిపెద్ద ప్రొఫెషనల్ సంస్థ అయిన ఫెడరేషన్ ఆఫ్ అబ్స్టెట్రిక్ అండ్ గైనకాలజికల్ సొసైటీస్ ఆఫ్ ఇండియా (FOGSI), యునిసెఫ్ సహకారంతో భారతదేశంలోని తల్లులు, శిశువుల సమగ్ర సంక్షేమంపై ఒక సంచలనాత్మక కార్యక్రమమైన ఆరోగ్య యోగ యాత్రను ప్రారంభించింది. ఫాగ్సి అధ్యక్షురాలు డాక్టర్ సునీతా తందూల్వాడ్కర్ ఆధ్యాత్మిక కేంద్రమైన తిరుపతిలో ఈ పరివర్తనాత్మక ప్రచారాన్ని ప్రారంభించారు. భారతదేశంలోని 13 ఆధ్యాత్మిక ప్రాముఖ్యత గల ప్రదేశాల్లో ఏడాది పొడవునా జరిగే ఈ జాతీయ కార్యక్రమం, ఆధ్యాత్మికతను వైద్యంలో అనుసంధానించడం, మహిళలు, వైద్యుల్లో ఆరోగ్యం పట్ల చురుకైన విధానాన్ని ప్రేరేపించడం లక్ష్యంగా పెట్టుకుంది.
ఈసంద‌ర్భంగా ఫాగ్సి అధ్యక్షురాలు డాక్టర్ సునీతా తందూల్వాడ్కర్ మాట్లాడుతూ… ప్రపంచంలో మొట్టమొదటి సారిగా ప్రారంభించిన ఈ తరహా ప్రచారం చాలా ప్రాముఖ్యత కలిగినదన్నారు. ఎందుకంటే మన దేశంలో ప్రపంచంలోనే పురాతనమైన ఆధ్యాత్మిక సంప్రదాయాలు ఉన్నాయన్నారు. వైద్యురాలిగా త‌న 34 సంవత్సరాల అనుభవంలో ప్రతిరోజూ ఉత్తమంగా త‌న సేవలను అందించడానికి త‌నకు ఆధ్యాత్మికత దోహదపడిందన్నారు. ఇది విశ్వ శక్తితో మనల్ని కలుపుతుందన్నారు. సమగ్రంగా నయం చేయడానికి మనల్ని నడిపిస్తుందన్నారు. ఈ యాత్ర అనేది అన్ని ఫాగ్సి సభ్యులతో, పెద్ద సమాజంతో ఈ సాక్షాత్కారాన్ని పంచుకోవడానికి ఒక మార్గమ‌న్నారు. ఈ జాతీయ ప్రచారం మహిళల్లో చురుకైన ఆరోగ్య నిర్వహణ సంస్కృతిని పెంపొందించడం, ఆరోగ్యకరమైన గర్భాలను పెంపొందించడంపై కూడా దృష్టి సారించిందన్నారు. ఈ రెండూ మహిళల అనారోగ్యం, మరణాలను గణనీయంగా తగ్గించడం ద్వారా మహిళల ఆరోగ్యానికి కీలకం కావచ్చన్నారు.
యునిసెఫ్ ఇండియా ఆరోగ్య నిపుణుడు డాక్టర్ సయ్యద్ హుబ్బే అలీ మాట్లాడుతూ… గర్భిణీ స్త్రీల మానసిక ఆరోగ్యం అత్యంత క్లిష్టమైనది కానీ తరచుగా నిర్లక్ష్యం చేయబడిన సమస్యగా నిలుస్తుందన్నారు. భారతదేశంలో గర్భధారణ సంబంధిత ఒత్తిడి 40% మంది మహిళలను, నిరాశ 20% మందిని, ఆందోళన 33% మందిని ప్రభావితం చేస్తుందన్నారు. ఈ ప్రచారం ద్వారా, యునిసెఫ్, ఫాగ్సి దేశవ్యాప్తంగా వైద్య సమాజంలో తల్లి మానసిక ఆరోగ్యాన్ని ఏకీకృతం చేయడానికి కట్టుబడి ఉన్నాయన్నారు.