Big Boss 10 telugu | ఒక్క రోహిత్‌ చుట్టూనే హౌస్‌ రచ్చ.. గేమ్‌ స్ట్రాటజీనా? లేక ఓవర్‌ ప్లానా?
ఆంధ్రప్రభ, వెబ్‌ డెస్క్‌: బిగ్‌బాస్‌ తెలుగు సీజన్‌ 10లో అసలు ఆట మొదలైంది. షో ప్రారంభమైన కొద్దిరోజుల్లోనే కంటెస్టెంట్ల మధ్య ఆధిపత్య పోరు మొదలైంది. హౌస్‌లో ఎవరి గేమ్‌ ఎలా ఉందనే చర్చ కంటే.. ప్రస్తుతం ఎవరు ఎవరిని టార్గెట్‌ చేస్తున్నారు? అన్నదే ఆసక్తికరంగా మారింది. ముఖ్యంగా త్రిగుణ్‌-రోహిత్‌ మధ్య జరుగుతున్న వార్‌ రోజురోజుకూ హీట్‌ పెంచుతోంది. ఇప్పుడు ఈ వార్‌ హౌస్‌ వర్సెస్‌ రోహిత్‌గా మారింది.
అగ్నిపరీక్ష ద్వారా హౌస్‌లోకి వచ్చిన రోహిత్‌ మొదటి నుంచే అందరి దృష్టిని ఆకర్షించాడు. అతడి ఆటతీరు, మాట్లాడే విధానం, హౌస్‌లో వ్యవహరిస్తున్న తీరు ఇప్పుడు చర్చకు కారణమవుతున్నాయి. ఇదే సమయంలో హౌస్‌ రోహిత్‌పై పదేపదే ప్రశ్నలు లేవనెత్తడం, అతడి నిర్ణయాలను తప్పుబట్టడం హౌస్‌లో కొత్త వివాదానికి తెరలేపింది.
రోహిత్‌పై ఫోకస్‌.. త్రిగుణ్‌ ప్లాన్‌ ఇదేనా?
బిగ్‌బాస్‌ హౌస్‌లో ఒక విషయంపై అందరి దృష్టి పడాలంటే.. ఏదో ఒక అంశాన్ని హైలైట్‌ చేయాల్సి ఉంటుంది. ముఖ్యంగా బలమైన కంటెస్టెంట్‌తో పోటీ పడటం ద్వారా తమ ఆటను ప్రేక్షకులకు చూపించుకునే ప్రయత్నం చాలామంది చేస్తుంటారు. ఇప్పుడు త్రిగుణ్‌ కూడా అదే మార్గాన్ని ఎంచుకున్నాడా? అనే చర్చ జరుగుతోంది. రోహిత్‌ను ప్రశ్నించడం, అతడి ఆటలో లోపాలను ఎత్తిచూపడం ద్వారా తాను హౌస్‌లో ప్రత్యేకంగా కనిపించాలని చూస్తున్నాడా? అన్న అనుమానాలు వ్యక్తమవుతున్నాయి.
చిన్న విషయాలు.. పెద్ద వివాదాలుగా
హౌస్‌లో సాధారణంగా జరిగే చిన్న చిన్న విషయాలే కొన్నిసార్లు పెద్ద గొడవలకు దారితీస్తాయి. గిన్నెల విషయంలో రోహిత్‌ను ప్రశ్నించడం, అతడి మాటలకు-చర్యలకు మధ్య తేడా ఉందంటూ విమర్శలు చేయడం ప్రస్తుతం చర్చనీయాంశంగా మారింది. అంతేకాకుండా ఇతర హౌస్‌మేట్స్‌ దగ్గర కూడా రోహిత్‌ గురించి చర్చలు జరగడం.. ఈ వివాదాన్ని మరింత పెంచుతున్నాయి. అయితే ఈ మొత్తం వ్యవహారం త్రిగుణ్‌కు ప్లస్‌ అవుతుందా? లేక రోహిత్‌పై ప్రేక్షకుల్లో సానుభూతి పెంచుతుందా? అన్నది ఆసక్తికరంగా మారింది.
టార్గెట్‌ చేసే ఆటలో రిస్క్‌ కూడా ఉంది!
బిగ్‌బాస్‌లో ఒక స్ట్రాంగ్‌ ప్లేయర్‌ను టార్గెట్‌ చేయడం కొంతమందికి గేమ్‌ ప్లస్‌గా మారుతుంది. ఎందుకంటే ఎక్కువగా కనిపించే అవకాశం వస్తుంది. కానీ అదే టార్గెటింగ్‌ హద్దులు దాటితే మాత్రం ఫలితం వ్యతిరేకంగా మారే అవకాశం ఉంటుంది. ఎవరినైనా పదేపదే ఇబ్బంది పెట్టే ప్రయత్నం చేస్తున్నట్లు ప్రేక్షకులకు అనిపిస్తే.. సానుభూతి మొత్తం టార్గెట్‌ అవుతున్న కంటెస్టెంట్‌కే వెళ్లే అవకాశం ఉంటుంది. ప్రస్తుతం త్రిగుణ్‌ విషయంలో కూడా ఇదే అంశం చర్చకు వస్తోంది. మరోవైపు వీకెండ్‌ ఎపిసోడ్‌లో నాగార్జున ఈ గొడవలపై ఎలాంటి స్పందన ఇస్తారన్న ఆసక్తి కూడా నెలకొంది.
