వైఎస్సార్‌టీపీ అధ్యక్షురాలు షర్మిల చేపట్టిన ప్రజాప్రస్థానం పాదయాత్రకు రంగారెడ్డి జిల్లాలో మంచి స్పందన వస్తోంది. పాదయాత్ర సందర్భంగా ఆమె ప్రజలతో మమేకమవుతూ.. వారి సమస్యలను అడిగి తెలుసుకుంటున్నారు. ఈ సందర్భంగా ఇప్పటికే ఆమెను టీటీడీ ఛైర్మన్ వైవీ సుబ్బారెడ్డి, వైసీపీ ఎమ్మెల్యే ఆళ్ల రామకృష్ణారెడ్డి కలిశారు. తాజాగా ఈరోజు ఆమె పాదయాత్రలో యాంకర్ శ్యామల పాల్గొన్నారు.
ఈ సందర్భంగా శ్యామల మాట్లాడుతూ సమాజంలో మార్పు కోసం వైస్సార్‌టీపీ అధ్యక్షురాలు షర్మిల చేస్తున్న పాదయాత్రలో పాల్గొనడం సంతోషంగా ఉందన్నారు. షర్మిలతో కలిసి నడవడానికి తాను సిద్ధమని అన్నారు. ఎనిమిది రోజులుగా అక్క నడుస్తున్నారని.. ప్రతి ఒక్కరు వారి సమస్యలను అక్కతో చెప్పుకుంటున్నారని.. ఆ విషయాన్ని తాను స్వయంగా చూశానని చెప్పారు.
ఒక సీఎం కూతురు, మరో సీఎం చెల్లెలు అయిన ష‌ర్మిల‌క్క ఎంతో సంతోషంగా ఉండొచ్చని.. కానీ, వారి నాన్నగారి ఆశయాలను భుజాన వేసుకుని ముందుకు సాగుతుండటం చాలా గొప్ప విషయమని శ్యామల అన్నారు.