తిరుపతి, ఆదోనిల‌లో ఎన్నిక‌ల ప్రచారం
తిరుప‌తిలో లక్ష ఉద్యోగాలు ఇస్తామ‌ని హామీ
అబివృద్ధి, సంక్షేమ‌మే బీజేపీ పాల‌సీ
తిరుపతి – ఏపీలో కూటమి గెలవబోతోందని బీజేపీ జాతీయాధ్యక్షుడు జేపీ నడ్డా అన్నారు. బీజేపీ, టీడీపీ, జనసేన కూటమికి ప్రజల ఆశీర్వాదాలు ఉన్నాయన్నారు. జగన్ ఒక మాఫియా నడుపుతున్నారని.. ఏపీలో ఇసుక, ల్యాండ్, లిక్కర్ మాఫియా జరుగుతోందని ఆరోపించారు. ప్రచారం ప‌ర్వంలో చివ‌రి రోజైన ఇవాళ ఆయన తిరుప‌తిలో రోడ్ షో నిర్వ‌హించారు.. ఈ సంద‌ర్భంగా ఆయన మాట్లాడుతూ… మోదీ దేశాన్ని అభివృద్ధి పథంలో నడిపిస్తున్నారన్నారు. సంక్షేమం, అభివృద్ధి మోదీ నినాదమన్నారు.
తిరుపతి కేంద్రంగా లక్ష ఉద్యోగాల కల్పన త‌మ లక్ష్యమని ఆయన ప్రకటించారు. తిరుపతి స్మార్ట్ సిటీగా ప్రకటించి అభివృద్ధి చేశామన్నారు. తిరుపతి ఎంతో గొప్ప పుణ్య క్షేత్రమని ఆయన అన్నారు. బీజేపీ దేశాన్ని అభివృద్ధి పథంలో నడిపిస్తోందని.. సమాజంలోని ప్రతి వర్గానికి మేలు చేశామని జేపీ నడ్డా స్పష్టం చేశారు. కూటమి అభ్యర్థులను గెలిపించాలని ప్రజలకు విజ్ఞప్తి చేశారు. ఈ స‌భ అనంత‌రం ఆయన ఆదోనిలో జ‌రిగిన రోడ్ షోలో పాల్గొన్నారు..