ఆంధ్రప్రదేశ్ డైరెక్టర్ జనరల్ ఆఫ్ పోలీస్ (డీజీపీ) ట్విట్టర్ ఖాతా సోమవారం హ్యాక్ అయ్యింది. దానిపై హ్యాకర్లు అసభ్యకరమైన ఫొటోను పోస్ట్ చేశారు. దీనిపై సైబర్ క్రైమ్ పోలీసులు కేసు నమోదు చేసి దర్యాప్తు చేస్తున్నారు. ఈ ఖాతా 2019లో క్రియేట్ అయ్యిందని, 2020 ఫిబ్రవరి నుంచి అది పనిచేయడం లేదని డిప్యూటీ ఇన్‌స్పెక్టర్ జనరల్ పి.హెచ్.డి. రామకృష్ణ తెలిపారు. సోమవారం కొందరు గుర్తుతెలియని వ్యక్తులు ఆ ఖాతాను హ్యాక్ చేశారని, దానిపై అభ్యంతరకరమైన ఫొటోను పోస్ట్ చేశారని తెలిపారు.
హ్యాక్ చేసిన పేజీకి సంబంధించిన ఫొటోలు, వీడియోలను కొందరు సోషల్ మీడియా ప్లాట్‌ఫామ్‌లలో పోస్ట్ చేయడంతో ఈ విషయం వెలుగులోకి వచ్చింది. కొంతమంది సోషల్ మీడియా వినియోగదారులు హ్యాక్ చేసిన ఖాతాలో పోస్ట్ చేసిన ఫొటోను లైక్ చేయడం ప్రారంభించారు. ఈ విషయాన్ని గమనించిన పోలీసు శాఖలోని టెక్నికల్‌ విభాగం ఆ ఫొటోను పేజీ నుంచి తొలగించింది. సైబర్ క్రైమ్ పోలీసులు కేసు నమోదు చేసి దర్యాప్తు ప్రారంభించారు.
