భూపతేశ్వర కోనలో ముగ్గురు విద్యార్థులు గల్లంతు..

తిరుప‌తి జిల్లా నాగ‌లాపురం ప‌రిధిలోని భూపతేశ్వర కోనలో ముగ్గురు విద్యార్థులు గల్లంత‌య్యారు. నాగలాపురం మండలంలో ఉన్న భూపతేశ్వర కోన అటవీ ప్రాంతంలో ఈ ఘటన చోటుచేసుకుంది. చెన్నైకి చెందిన ఐదుగురు విద్యార్థులు ఆహ్లాదం కోసం అక్క‌డికి వెళ్లారు. నీటిలో దూకిన ముగ్గురు ఎంతసేపటికి పైకి రాకపోవడంతో తోటి స్నేహితులు ఇరువురు పోలీసులకు సమాచారమిచ్చారు. నీటిలో మునిగిన మాధవన్, నవీన్, కార్తీక్ ప్రసాద్ గా తోటి స్నేహితులు వెల్లడించారు. సంఘటన స్థలానికి నాగలాపురం పోలీసుల తో పాటు ఫైర్ ఇంజన్ సిబ్బంది, గజ ఈతగాళ్లతో గాలింపు చర్యలు చేప‌ట్టారు. సత్తివేడు సిఐ శివకుమార్ ఆధ్వర్యంలో సహాయక చర్యలు కొనసాగుతున్నాయి.