చింతూరు, ఏఎస్ఆర్ జిల్లా (ఆంధ్రప్రభ ): చింతూరు మన్యంలో మావోయిస్ట్‌ పార్టీ దళ సభ్యురాలు బుధవారం చింతూరు ఏఎస్పీ పంకజ్‌ కుమార్‌ మీనా ఎదుట చింతూరు సబ్‌ డివిజనల్‌ పోలీస్‌ కార్యాలయంలో లొంగిపోయారు. ఈ సందర్భంగా ఏఎస్పీ కార్యాలయంలో ఏర్పాటు చేసిన విలేకరుల సమావేశంలో లొంగిపోయిన దళ సభ్యురాలి వివరాలను ఏఎస్పీ వెల్లడించారు. ఆంధ్రా సరిహద్దు రాష్ట్రమైన చత్తీస్ ఘడ్‌ రాష్ట్రం సుకుమా జిల్లా చింతగుప్ప పోలీస్‌స్టేషన్‌ పరిధిలోని దులోడ్‌ గ్రామానికి చెందిన సీపీఐ మావోయిస్ట్‌ పార్టీ, బస్తర్‌ డివిజినల్‌ కమిటీ టైలరింగ్‌ బృందం సభ్యురాలు సోడి సుక్కి లొంగిపోయినట్లు తెలిపారు.
ఈమెకు 22 సంవత్సరాలు ఉన్నప్పుడు పామేడు ఏరియా కమిటీ, సీఎన్‌ఎమ్‌ అధ్యక్షుడు తరుచూ దులోడ్‌ గ్రామాన్ని సందర్శిస్తూ పాటలు, నృత్యాల ద్వారా ఈమెను మావోయిస్ట్‌ పార్టీ వైపు ఆకర్షించేలా చేయడంతో ఆమె మావోయిస్టు పార్టీలో జాయిన్‌ అయిందని తెలిపారు. ఈ క్రమంలో 2022 వ సంవత్సరం సెప్టెంబర్‌ నెలలో సోడి సుక్కీని ఏ సెక్షన్‌ ఫ్లాటూన్‌, సెకండ్‌ కంపినీ, పీఎల్‌జీఏ బెటాలియన్‌ సభ్యురాలుగా నియమించారు. ఈమెకు 6 నెలల పాటు శిక్షణ ఇచ్చి పార్టీ సభ్యురాలుగా పదోన్నతి కల్పించి అగ్రికల్చరల్‌ బృందానికి బదిలీ చేసినట్లు ఆయన పేర్కోన్నారు. ఈమె మావోయిస్ట్‌ పార్టీలో ఉన్నప్పుడు 2023లో మెట్టగూడెం అటవీ ప్రాంతంలో జరిగిన ఈవోఎఫ్‌ ఘటనలో పాల్గొన్నట్లు పేర్కొన్నారు.
తల్లి మరణంతో పార్టీని వీడిన సోడి సుక్కీ…
సోడి సుక్కీ తల్లి ఈ ఏడాది జనవరిలో మృతి చెందిందని, తల్లి మృతదేహాన్ని చూడటానికి కూడా మావోయిస్ట్‌ పార్టీ పెద్దలు ఒప్పుకోకపోవడం, అప్పటి నుండి పార్టీకి దూరంగా ఉంటూ వస్తుందని ఏఎస్పీ పేర్కొన్నారు. ఈ తరుణంలోనే మావోయిస్టు పార్టీ సిద్దాంతాలకు విసిగిపోయి, పోలీస్‌ పరివర్తన కార్యక్రమాలు, ఆత్మీయ సమ్మేళనాలతో పోలీసులు గిరిజనులకు చేరువవుతుండడంతో పాటు ప్రభుత్వం గిరిజన గ్రామాల్లో చేస్తున్న అభివృద్ధిని చూసి జనజీవన స్రవంతిలోకి వచ్చి ప్రశాంత జీవితం గడపడానికి లొంగిపోయిందన్నారు.
ప్రశాంత జీవనం గడిపేందుకు…
మావోయిస్ట్‌ పార్టీని వదిలి జనజీవన స్రవంతిలో కలిసేందుకు లొంగిపోయిన సోడి సుక్కీకి ప్రశాంతమైన జీవితాన్ని గడిపేందుకు రూ.1 లక్ష రూపాయల నగదు, ఇతర వసతులు కల్పిస్తామని ఏఎస్పీ పేర్కోన్నారు. ప్రస్తుతానికి ఆమెకు దుస్తులు, నిత్యవసర వస్తువులను ఏఎస్పీ అందజేశారు. మావోయిస్టులు అడవుల్లో ఉండి సాధించేది ఏమీలేదని, జనజీవన స్రవంతిలోకి రావాలని పిలుపునిచ్చారు. ఈ కార్యక్రమంలో సీఆర్పీఎఫ్‌ సహాయక కమాండెంట్‌ దివాకర్‌, చింతూరు సీఐ దుర్గా ప్రసాద్‌, ఎస్సై పేరూరి రమేష్‌, గజేంద్ర కుమార్‌, ఎస్సై శ్రీనివాస్‌ రావు, తదితరులు పాల్గొన్నారు.
