తెనాలి, జనవరి 2 ప్రభా న్యూస్ : ప్రజా సమస్యలు తెలుసుకోవడానికి గతంలో నాయకులు పాద యాత్రలు చేస్తే ఈ ముఖ్యమంత్రి మాత్రం అబద్ధాలు చెప్పడానికి, ప్రజలను మోసం చేయడానికి పాదయాత్ర చేశార’ని జనసేన పార్టీ రాజకీయ వ్యవహారాల కమిటీ ఛైర్మన్ నాదెండ్ల మనోహర్ అన్నారు. తెనాలిలో పారిశుధ్య కార్మికులు చేపట్టిన దీక్షకు మంగళవారం మనోహర్ జనసేన పార్టీ తరఫున సంఘీభావం తెలిపారు. ఈ సందర్భంగా నాదెండ్ల మాట్లాడుతూఅడిగి అడిగి అలసిపోయిన తరువాతే పారిశుధ్య కార్మికులు తమ హక్కుల కోసం రోడ్డెక్కారని అన్నారు.
నిత్యం పట్టణ పరిశుభ్రత కోసం వారి ప్రాణాలను పణంగాపెట్టి పని చేసే పారిశుద్ధ్య కార్మికుల సమస్యల పరిష్కారానికి ప్రభుత్వం చొరవ చూపాలన్నారు.కార్మికులు 8 రోజులుగా దీక్షలు చేస్తున్నా స్పందించని ప్రభుత్వం… స్పందనలాంటి కార్యక్రమాలు నిర్వహిస్తున్నామని చెప్పడం హాస్యాస్పదమన్నారు. నిజంగా ఇది మనసున్న ప్రభుత్వమే అయితే కార్మికులతో కూర్చొని మాట్లాడి సమస్యకు పరిష్కారం చూపేదని చెప్పారు. వచ్చేది జనసేన- తెలుగుదేశం ఉమ్మడి ప్రభుత్వమేనని, పారిశుధ్య కార్మికుల సమస్యలను పరిష్కరించడంతో పాటు వారి జీవితాల్లో వెలుగులు నింపే విధంగా, సమాజంలో గౌరవంగా జీవించేలా చర్యలు తీసుకుంటామని అన్నారు.
ఈ కార్యక్రమంలో జనసేన పార్టీ గుంటూరు జిల్లా అధ్యక్షులు గాదె వెంకటేశ్వరరావు, రాష్ట్ర సంయుక్త కార్యదర్శి బండారు రవికాంత్, జిల్లా ఉపాధ్యక్షులు ఇస్మాయిల్ బేగ్, జనసేన నాయకులు హరిదాసు గౌరీశంకర్, పసుపులేటి మురళీకృష్ణ, సి.ఐ.టి.యు. వర్కర్స్ ప్రెసిడెంట్ మంగళగిరి వెంకటేశ్వర్లు తదితరులు పాల్గొన్నారు.