అమరావతి, ఆంధ్రప్రభ: రాష్ట్ర గవర్నర్‌ బిశ్వభూషణ్‌ హరిచందన్‌ ప్రముఖ ఒడిశా కవి, ఒడిస్సా సాహిత్య అకాడమీ అవార్డు గ్రహీత డాక్టర్‌ భగవన్‌ జయసింగ్‌ ‘టికీ అటకిజా-ఏ, పంత్‌ (కొంచెం వేచి ఉండండి, ఓ ట్రావెలర్‌)’ పేరిట రచించిన ఎనిమిదో ఒడియా కవితల సంకలనం పుస్తకాన్ని మంగళవారం ఆవిష్కరించారు. జీవన గమనంలో ఓ ప్రయాణికుడిగా మృత్యువును ఆలింగనం చేసుకునే క్షణాన, దు:ఖాలు, వేదనలతో నిండిన సమకాలీన వాస్తవికతలో భాగంగా గత జ్ఞాపకాలను పునశ్చరణ చేసే కథానాయకుడి అనుభవం ఆధారంగా ఈ కవితలు రూపుదిద్దుకున్నాయి.
స్వయంగా రచయిత, కవి అయిన రాష్ట్ర గవర్నర్‌ హరిచందన్‌ ఈ సందర్భంగా మాట్లాడుతూ వాస్తవికతకు దగ్గరగా ఈ కవితా సంపుటి ఉందన్నారు. విభిన్న అంశాలను కధానాయకుడు మననం చేసుకునే విధానం ఈ కవితా సంపుటిలో ఆలోచింపచేసేదిగా సాగిందన్నారు. రాజ్‌ భవన్‌లో జరిగిన ఈ కార్యక్రమంలో ఒడిశా సాహిత్య అకాడమీ కన్వీనర్‌ బిజయానంద్‌ సింగ్‌, గవర్నర్‌ ప్రత్యేక ప్రధాన కార్యదర్శి ఆర్పీ సిసోడియా, రాజ్‌ భవన్‌ సంయుక్త కార్యదర్శి శ్యామ్‌ ప్రసాద్‌, ఉప కార్యదర్శి సన్యాసి రావు తదితరులు పాల్గొన్నారు.
లోక‌ల్ టు గ్లోబ‌ల్.. ప్రభన్యూస్ కోసం ఫేస్‌బుక్‌, ట్విట‌ర్, టెలిగ్రామ్ పేజీల‌ను ఫాలో అవ్వండి..