శ్రీశైలంలో మహాశివరాత్రి బ్రహ్మోత్సవాలను పురస్కరించుకుని శ్రీకాళహస్తి దేవస్థానం వారు మంగళవారం సాయంత్రం శ్రీశైల భ్రమరాంబిక, మల్లికార్జున స్వామి అమ్మవార్లకు పట్టువస్త్రాలను సమర్పించారు . శ్రీకాళహస్తి దేవస్థానం తరుపున ఆ దేవస్థాన కార్యనిర్వహణాధికారి ఇ.పెద్దిరాజు పట్టువస్త్రాలను సమర్పించారు. ఈ సమర్పణ కార్యక్రమంలో ముందుగా ఆలయ రాజగోపురం వద్ద సంప్రదాయాన్ని అనుసరించి అధికారులు, అర్చకులు , వేదపండితులు, శ్రీ కాళహస్తి దేవస్థానం అధికారులకు స్వాగతం పలికారు. తరువాత ఆలయ రాజగోపురం వద్ద పట్టువస్త్రాలకు ప్రత్యేక పూజలు నిర్వహించారు.
అనంతరం శ్రీకాళహస్తి దేవస్థానం అధికారులు వైదిక సిబ్బంది మేళతాళాలతో ఆలయ ప్రవేశం చేసి వస్త్ర సమర్పణ చేశారు. కార్యక్రమంలో కార్యనిర్వహణాధికారితో పాటు ఆ దేవస్థానం సహాయకార్యనిర్వహణాధికారి ఐ.ఎన్.వి. మోహన్ , వేదపండితులు ఎ . ప్రసాదశర్మ , సంగమేశ్వరశాస్త్రి, అర్చకులు రాకేష్ శర్మ, సిబ్బంది పాల్గొన్నారు. ఈ సందర్భంగా శ్రీకాళహస్తి దేవస్థానం కార్యనిర్వహణాధికారి మాట్లాడుతూ మొట్టమొదటిసారిగా దేవస్థానం తరుపున శివరాత్రి బ్రహ్మోత్సవాలలో పట్టువస్త్రాలను సమర్పించినట్టు తెలిపారు. మహాశివరాత్రి పర్వదినాలలో స్వామి అమ్మవార్లకు పట్టువస్త్రాలను సమర్పించడం తమ అదృష్టంగా భావిస్తున్నామన్నారు .