(ప్రభ న్యూస్ బ్యూరో, శ్రీకాకుళం) : మే 13న జరుగనున్న సార్వత్రిక ఎన్నికల పోలింగ్ లో ప్రతి ఒక్కరూ ఓటు వేసేందుకు తరలిరావాలని, ఓటు వేయడం మనందరి బాధ్యత అని జిల్లా కలెక్టర్, జిల్లా ఎన్నికల అధికారిమనజీర్ జిలాని సామూన్ పిలుపునిచ్చారు. స్వీప్ కార్యక్రమంలో భాగంగా నీ ఓటు, నీ భవిష్యత్తు అంటూ ఓటు హక్కు వినియోగంపై 80ఫీట్ రోడ్డు మిల్లు జంక్షన్ వద్ద జిల్లా గ్రామీణ అభివృద్ధి సంస్థ నిర్వహించిన బైక్ ర్యాలీని జిల్లా కలెక్టర్ జెండా ఊపి ప్రారంభించారు.
మిల్లు జంక్షన్ నుంచి ప్రారంభమైన ఈ బైక్ ర్యాలీ సూర్యమహల్, ఏడు రోడ్ల జంక్షన్ మీదుగా ఆర్టిసి కాంప్లెక్స్ వరకు ర్యాలీ నిర్వహించడం జరిగింది. ర్యాలీలో జాయింట్ కలెక్టర్ ఎం నవీన్, సహాయ కలెక్టర్ రాఘవేంద్ర మీనా, రెవిన్యూ డివిజనల్ అధికారి సి హెచ్ రంగయ్య పాల్గొన్నారు.
ఈ సందర్భంగా జిల్లా కలెక్టర్ మాట్లాడుతూ ప్రతి ఒక్కరూ ఓటుని వినియోగించుకోవాలని పిలుపునిచ్చారు. మే 13న జరుగనున్న సాధారణ ఎన్నికల్లో 2019 వ సంవత్సరం కన్నా ఎక్కువ శాతం ఓటింగ్ జరగాలన్నారు. ఓటు హక్కు కలిగిన ప్రతి ఒక్కరూ మే 13వ తేదీన పోలింగ్ రోజు ఓటు వేసేందుకు తరలిరావాలన్నారు. 18 సంవత్సరాలు నిండి ఓటు హక్కు కలిగిన ప్రతి ఒక్కరూ ఎన్నికల్లో పోలింగ్ రోజు ఓటు వేయాలన్నారు.
ఈ బైక్ ర్యాలీలో సహాయ కలెక్టర్ రాఘవేంద్ర మీనా, డిఆర్డిఏ పిడి కిరణ్ కుమార్, ఎల్.డి.ఎం, సూర్య కిరణ్, మెప్మా పిడి కిరణ్, ఎన్వైకే కోఆర్డినేటర్ ఉజ్వల్, జిల్లా పౌర సంబంధాల అధికారి కె. బాల మాన్ సింగ్, హౌసింగ్ పి.డి గణపతి రావు, జిల్లా పర్యాటక అధికారులు ఎన్. నారాయణ రావు, సెటశ్రీ సిఇఓ ప్రసాద రావు, ఇంటెక్ సభ్యులు ఎం శ్రీనివాస రావు, వివిధ శాఖల ఉద్యోగులు, పెద్ద సంఖ్యలో యువతి యువకులు తదితరులు పాల్గొన్నారు.