- కారును ఢీకొట్టిన ట్రావెల్స్ బస్సు
- నాయుడుపేట వ‌ద్ద హైవేపై ప్రమాదం
- శుభ‌కార్యానికి వెళ్తుండగా ఘటన
- మరొకరి పరిస్థితి విష‌మం, ఆస్పత్రికి త‌ర‌లింపు
ఆంధ్ర‌ప్ర‌భ స్మార్ట్, నాయుడుపేట: తిరుపతి జిల్లాలో రోడ్డు ప్రమాదం జరిగింది. కారును ట్రావెల్స్ బస్సు ఢీకొట్టింది. పూతలపట్టు నాయుడుపేట నేషనల్ హైవేపై బుధవారం అర్థరాత్రి ఈ ప్రమాదం జరిగింది. దీంతో ఇద్దరు మహిళలు అక్కడిక‌క్కడే మరణించారు. మరొకరి పరిస్థితి విషమంగా ఉంది. గాయపడిన వ్యక్తిని చికిత్స నిమిత్తం దగ్గరలో ఉన్న ఆస్పత్రికి తరలించారు. బంధువుల గృహ ప్రవేశం కోసం బెంగళూరు నుంచి కేవీబీపురానికి కారులో వెళ్తుండగా ఈ యాక్సిడెంట్ జరిగినట్లు తెలుస్తోంది. ప్రమాదంపై సమాచారం అందుకున్న పోలీసులు సంఘటనా స్థలానికి చేరుకుని స‌హాయక చ‌ర్యలు చేప‌ట్టారు. రోడ్డు ప్రమాదంపై కేసు నమోదు చేశారు. ప్రమాదం ఎలా జరిగిందనే కోణంలో దర్యాప్తు చేస్తునట్లు పోలీసులు తెలిపారు.
మరో ఘటనలో..
మహారాష్ట్రలో మరో ప్రమాదం జరిగింది. జల్గావ్‌ జిల్లాలో అంబులెన్స్‌ ఇంజిన్‌లో మంటలు చెలరేగి ఆక్సిజన్‌ సిలిండర్‌ పేలిపోయింది. ఈ ఘటనలో గర్భిణితో పాటు ఆమె కుటుంబం ప్రాణాలతో బయటపడ్డారు. నిన్న జరిగిన ఈ ఘటన సంబంధించిన వీడియో సోషల్‌ మీడియాలో వైరల్‌గా మారింది. అంతేకాకుండా ఆక్సిజన్‌ సిలిండర్‌ పేలుడు ధాటికి చుట్టుపక్కల ఉన్న ఇండ్ల అద్దాలు సైతం పగిలిపోయాయి.
స్థానిక సమాచారం ప్రకారం.. ఓ గర్భిణితో పాటు కుటుంబ సభ్యులు ఎరండోల్‌ ప్రభుత్వ ఆస్పత్రికి వెళ్తోంది. జల్గావ్‌లోని దాదావాడి సమీపంలోని హైవేపై ఒక్కసారిగా అంబులెన్స్‌లో పేలుడు సంభవించింది. ఇంజిన్‌లో నుంచి మంటలు రావడం గమనించిన డ్రైవర్‌ వాహనంలో ఉన్న గర్భిణి, ఆమె కుటుంబ సభ్యులను దింపివేశాడు. ఈ ప్రమాదంలో ఎవరికీ గాయాలు కాకుండా.. అంబులెన్స్‌లో ఉన్నవారు సురక్షితంగా బయటపడ్డారు. అంబులెన్స్‌లో ఉన్న ఆక్సిజన్‌ ట్యాంక్‌ భారీ శబ్దంతో పేలిపోవడంతో అక్కడి వారంతా అప్రమత్తమయ్యారు.