టెక్నాలజీ ద్వారానే పేదరికాన్ని ఎదుర్కోగలం.. ఇస్రో చైర్మన్‌ సోమ్‌నాథ్‌

అనంతపురం, ప్రభన్యూస్‌ బ్యూరో: కేవలం టెక్నాలజీ ద్వారానే దేశంలో పేదరికం, ఆకలి, అనారోగ్యం వంటి సామాజిక సమస్యలను సమర్థవంతంగా ఎదుర్కోగలమని ఇస్రో చైర్మన్‌ ఎస్‌.సోమ్‌నాథ్‌ పేర్కొన్నారు. ఇస్రో చైర్మన్‌ శనివారం అనంతపురం జేఎన్టీయూలో నిర్వహించిన 12వ స్నాతకోత్సవ కార్యక్రమానికి ముఖ్య అతిథిగా హాజరయ్యారు. ఈ సందర్భంగా ఆయన మాట్లాడుతూ, ఒకప్పుడు ఆకలితో అలమటించిన దేశం అనంతరం టెక్నాలజీలో వచ్చిన మార్పుల కారణంగా హరిత విప్లవం ద్వారా గోధుమ ఉత్పత్తి పెంచి ఆకలిని జయించిందన్నారు. స్వాతంత్రం వచ్చే నాటికి దేశంలో సగటు- మనిషి జీవిత కాలం 30 ఏళ్లకు అటు ఇటుగా ఉండేదని, వైద్య రంగంలో వచ్చిన సాంకేతిక పరిజ్ఞానం ద్వారా అది దాదాపు 70 ఏళ్లకు చేరుకుందన్నారు. టెక్నాలజీ అభివృధ్ధిలో విద్యార్థులు భాగస్వాములై దేశాభివృద్ధికి దోహద పడాలని పిలుపునిచ్చారు.