మహారాష్ట్ర ఎన్నికల్లో ఎన్డీయే మహాయుతి కూటమి ఘనవిజయం సాధించింది. దీంతో బీజేపీ నేతృత్వంలోని మహాయుతి కూటమి మరోసారి అధికారం చేపట్టనుంది. కాగా, ఎన్నికల సమయంలో ఏపీ డిప్యూటీ సీఎం పవన్ కల్యాణ్ మహారాష్ట్రలోని పది నియోజకవర్గాల్లో ఎన్డీయే తరపున ప్రచారం చేశారు.
పవన్ ప్రచారం చేసిన అన్ని నియోజకవర్గాల్లో పవన్ మద్దతిచ్చిన ఎన్డీయే అభ్యర్థులు విజయం సాధించారు. ఈ నేపథ్యంలో తాజాగా మహారాష్ట్ర ఎన్నికల ఫలితాలపై పవన్ కల్యాణ్ ట్విట్టర్ వేదికగా స్పందించారు.
నిజాయితీకి, అభివృద్ధికే ప్రజలు ఓటు…
మహారాష్ట్ర ఎన్నికల్లో ఘనవిజయం సాధించిన ఎన్డీయే మహాయుతి కూట‌మికి అభినందనలు తెలిపారు. ఈ విజయం ప్రధాని మోదీ మీద మహారాష్ట్ర ప్రజలకు ఉన్న నమ్మకాన్ని తెలియచేస్తుందని… నిజాయితీ, అభివృద్ధికే ప్రజలు ఓటేశారని పేర్కొన్నారు.
దేవేంద్ర ఫడ్నవీస్, ఏక్‌నాథ్ శిండే, అజిత్ పవార్ నాయకత్వం ప్రజల్లో విశ్వాసం నింపిందని అన్నారు. ఎన్డీయే అభ్యర్థుల తరఫున మహారాష్ట్రలో తాను ప్రచారం చేయడం గౌరవంగా భావిస్తున్నట్లు పేర్కొన్నారు. మరాఠా ప్రజలు చూపించిన ప్రేమ, అభిమానాలను మర్చిపోలేను అని.. ప్రజల కోసం, అభివృద్ధి కోసం మహారాష్ట్ర, ఆంధ్రప్రదేశ్ రాష్ట్రాలు కలిసి పనిచేద్దాం అంటూ ట్వీట్ చేసారు.