రానున్న జ‌న‌ర‌ల్ ఎల‌క్ష‌న్స్‌లో వైసీపీ ప్ర‌భుత్వాన్ని గ‌ద్దె దించ‌డ‌మే ల‌క్ష్యంగా అన్ని పార్టీలు క‌లిసి ప్ర‌జా ఉద్య‌మం చేయాల‌ని కీల‌క వ్యాఖ్య‌లు చేసిన టీడీపీ అధినేత నారా చంద్ర‌బాబుపై వైసీపీ కీల‌క నేత, ఏపీ వ్య‌వ‌సాయ మంత్రి కాకాణి గోవ‌ర్ధ‌న్ రెడ్డి సీరియ‌స్ వ్యాఖ్య‌లు చేశారు. ప‌లు విమర్శలు గుప్పించారు. ఏ ఎన్నిక‌ల్లోనూ సొంతంగా పోటీ చేసే ధైర్యం చంద్ర‌బాబుకు లేద‌ని కాకాణి ధ్వ‌జ‌మెత్తారు. చంద్రబాబు చరిత్ర ఎవరికి తెలియనిద‌ని ప్ర‌శ్నించిన కాకాణి.. గ‌తంలో బీజేపీతో పొత్తు పెట్టుకున్నార‌ని చెప్పారు.
దత్తపుత్రుడిని పక్కన పెట్టుకున్న చంద్రబాబు గ‌తంలో తిట్టిన బీజేపీతోనే మళ్లీ పొత్తుకు ఆరాట‌ప‌డుతున్నార‌ని విమ‌ర్శించారు. మామ నుంచి పార్టీ లాక్కున్న వ్యక్తికి నైతికత ఏముంటుందని కాకాణి తీవ్ర విమర్శలు చేశారు. ఎప్పుడు ఎన్నికలొచ్చినా పొత్తులతోనే బాబు పోటీ చేస్తారన్న కాకాణి.. చంద్ర‌బాబుకు నైతికత, సిద్ధాంతం లేవని దెప్పిపొడిచారు. ఎవరితోనైనా పొత్తుకు ప్రయత్నాలు చేస్తారని, వీళ్లంతా కట్టకట్టుకుని వచ్చినా త‌మ‌ను ఏమీ చేయలేరని మంత్రి కాకాణి వ్యాఖ్యానించారు.