పోరుమామిళ్ల (రాయలసీమ ప్రభ వెబ్ ప్రతినిధి) : పోరుమామిళ్ల అటవీ రేంజ్ పరిధిలో నిర్వహించిన దాడుల్లో 23ఎర్రచందనం దుంగలతో ఐదుగురు స్మగ్లర్ లను అరెస్టు చేసినట్టు ఎర్రచందనం అక్రమ రవాణా నిరోధక టాస్క్ ఫోర్స్ అధికారులు సోమవారం వెల్లడించారు. ఆ అధికారుల కథ‌నం ప్రకారం టాస్క్ ఫోర్స్ ఎస్పీ కే.చక్రవర్తి ఆదేశాల మేరకు ఆర్ఐ చిరంజీవులకు చెందిన ఆర్ఎస్ఐ రాఘవేంద్ర టీమ్ పోరుమామిళ్ల అటవీ రేంజ్ లోని టేకూరు పేట మీదుగా కవలకుంట్ల ప్రాంతంలో కూంబింగ్ చేపట్టారు.
కొమ్మినేని రాస్తా ఎడమ వైపు అనుమానాస్పదంగా కనిపించిన కారు, మోటారు సైకిల్ వద్దకు వెళ్లి చూడగా, కొందరు కారులో దుంగలను లోడ్ చేస్తూ కనిపించారు.
వారిని చుట్టుముట్టే ప్రయత్నం చేయగా, దుంగలను పడేసి పారిపోయారు. అయితే వారిలో ఐదుగురిని పట్టుకోగలిగారు. వారిని పోరుమామిళ్ల టౌన్ కు చెందిన పాలగిరి నాగార్జున (32), పెద్దేటి నాగరాజు (35), గుజ్జుల వెంకటేశ్వర్లు (42), చినమల వెంకటయ్య (62), పులివెందులకు చెందిన నీరెద్దుల ప్రకాష్ (20)లుగా గుర్తించి అదుపులోకి తీసుకున్నారు. వారి నుంచి 23ఎర్రచందనం దుంగలను స్వాధీనం చేసుకున్నారు. అంతేకాక వారి నుంచి ఒక కారు, ఒక మోటారు సైకిల్ స్వాధీనం చేసుకున్నట్టు టాస్క్ ఫోర్స్ అధికారులు తెలిపారు. ఈ మేరకు కేసును తిరుపతి టాస్క్ ఫోర్సు పోలీసు స్టేషన్ లో నమోదు చేయగా, సీఐ బాలకృష్ణ దర్యాప్తు చేస్తున్నారు.