అమ‌రావ‌తి – వైసీపీ కీలక నేత, రాజ్యసభ సభ్యులు విజయసాయి రెడ్డి మీద లుక్ అవుట్ సర్క్యులర్ (ఎల్వోసీ) జారీ అయింది. కాకినాడ సీపోర్ట్స్ లిమిటెడ్ (కేఎస్పీఎల్), కాకినాడ సెజ్ (కేఎజెడ్) లిమిటెడ్ రూ.3,600 కోట్ల విలువైన వాటాలను కర్నాటి వెంకటేశ్వరరావు నుంచి బలవంతంగా లాగేసుకున్నారనే ఫిర్యాదుతో విజయసాయి రెడ్డి, వైసీపీ ఎంపీ వైవీ సుబ్బారెడ్డి కుమారుడు విక్రాంత్ రెడ్డి, అరబిందో ఫార్మా లిమిటెడ్ కు చెందిన శరత్ చంద్ర రెడ్డిలపై ఏపీ సీఐడీ కేసు నమోదు చేసిన సంగతి తెలిసిందే.

ఈ క్రమంలోనే విజయసాయిరెడ్డి, విక్రాంత్ రెడ్డి, శరత్ చంద్ర రెడ్డిలపై ఏపీ సీఐడీ ఎల్వోసీ జారీ చేసింది. వీరు విదేశాలకు పారిపోకుండా ఉండేందుకు ముందు జాగ్రత్త చర్యగా ఎల్వోసీ జారీ చేసినట్టుగా సీఐడీ వర్గాలు పేర్కొన్నాయి.

ఇక కాకినాడు పోర్టు గ‌తంలో య‌జమానిగా ఉన్న కర్నాటి వెంకటేశ్వరరావు సోమవారం దాఖలు చేసిన ఫిర్యాదులో.. కేఎస్పీఎల్లో 41.12 శాతం, కేఎస్ఈజెడ్లో 48.74 శాతం తమ కుటుంబ యాజమాన్యంలోని సంస్థల వాటాలు ఉన్నాయి., వాటి విలువ రూ. 3600 కోట్లు. అయితే వాటిని రూ. 500 కోట్ల కంటే తక్కువకు బెదిరింపులకు పాల్పడి లాగేసుకున్నారని శ‌ర‌త్ చంద్ర‌రెడ్డి, విజ‌య‌సాయి, విక్రాంతిరెడ్డిల‌పై ఆయ‌న లిఖిత పూర్వకంగా ఫిర్యాదు చేశారు.

కాకినాడ పోర్టులో రూ.2500 కోట్ల విలువైన తన వాటాను రూ.494 కోట్లకు, సెజ్ ఉన్న రూ.1,109 కోట్ల విలువైన వాటాను కేవలం రూ.12 కోట్లకే లాక్కున్నారని వాపోయారు. షేర్ల బదిలీకి తాను అంగీకరించకపోతే.. క్రిమినల్ కేసులు, విజిలెన్స్ విచారణలు, తనతో పాటు తన కుటుంబ సభ్యుల అరెస్టులు ఎదుర్కొవాల్సి వస్తుందని బెదిరింపులకు పాల్పడ్డారని ఫిర్యాదులో వెంకటేశ్వరరావు ఆరోపించారు.

అప్పటి ముఖ్యమంత్రి వైఎస్ జగన్ కోసం ఈ లావాదేవీలు జరుగుతున్నాయని.. షేర్లను విడిచిపెట్టమని విక్రాంత్ రెడ్డి తనతో చెప్పారని పేర్కొన్నారు. తన కంపెనీ ఆదాయంలో 22 శాతం ప్రభుత్వానికి చెల్లించేలా ఒప్పందం ఉందని.. అయితే 2019లో వైసీపీ ప్రభుత్వం ఏర్పడిన నాటి నుంచి ఇబ్బందులు మొదలయ్యాయని చెప్పారు.

ఒప్పందాలపై సంతకాలు చేసిన తర్వాత విక్రాంత్ రెడ్డి, శరత్ చంద్రారెడ్డి విజయవాడలో జగన్ను కలవాలని తనను కోరినట్లు ఫిర్యాదులో పేర్కొన్నారు. “నేను విజయవాడ వెళ్లి విక్రాంత్ రెడ్డిని కలిశాను. ఆయన నన్ను జగన్ ఇంటికి తీసుకెళ్లారు. ఈ సమావేశంలో విక్రాంత్ రెడ్డి జరిగిన సంఘటనలను వివరించారు. నేను నా ఆవేదనను తెలియజేసేందుకు ప్రయత్నించగా.. జగన్ నన్ను ఏమీ మాట్లాడనివ్వలేదు. శ్రీకాంత్ రెడ్డి చెప్పినట్టుగా నడుచుకోవాలని నన్ను కోరారు” అని వెంకటేశ్వరరావు ఫిర్యాదులో పేర్కొన్నారు.
అయితే ఈ ఆరోపణలను వైసీపీ ఖండించింది. ఈ చర్య వెనక రాజకీయ ప్రతీకారం ఉందని వైసీపీ సీనియర్ నేత కాకాణి గోవర్ధన్ రెడ్డి విమర్శించారు. రాష్ట్రంలోని వాస్తవ సమస్యల నుంచి దృష్టి మరల్చేందుకు ముఖ్యమంత్రి చంద్రబాబు నాయుడు నేతృత్వంలోని రాష్ట్ర ప్రభుత్వం చేస్తున్న మరో చౌకబారు ప్రయత్నమని విజయసాయిరెడ్డి ఆరోపించారు.