శ్రీకాకుళం, (ప్రభన్యూస్) : ఇంటింటికి కుళాయి కనెక్షన్ల పనులను ఏపీ ప్రభుత్వం సీరియస్గా తీసుకుంటుంది. అయితే.. ఈ పనులు చేయడంలోనూ, పనితీరులో వెనుకబడినందుకు శ్రీకాకుళం ఆర్డబ్ల్యూఎస్ ఎస్ఈకి కలెక్టర్ శ్రీకేష్ లాఠకర్ షోకాజ్ నోటీసు జారీ చేశారు. అంతేకాకుండా పలాస, ఎచ్చెర్ల డీఈలతోపాటు వజ్రపుకొత్తూరు, పలాస ఎఈలకు సస్పెన్షన్ ఉత్తర్వులు జారీ చేయాలని ఆర్డబ్ల్యుఎస్ ఎస్ఈ ప్రసాదరావును కలెక్టర్ ఆదేశించారు. శానిటరీ కాంప్లెక్స్ పనులు పునాది దశలోనే ఉన్నాయని, ఆ పనులను వేగవంతం చేయాలని ఆదేశించారు.శానిటరీ కాంప్లెక్స్ నిర్మాణాల్లో పూర్ పెర్ఫార్మెన్స్ ఉన్నందున ఎచ్చెర్ల, మందస మండలాల ఏఈలకు షోకాజ్ నోటీసులు జారీ చేయాలని ఎస్ఈ ని ఆదేశించారు.
ఇంటింటికీ కుళాయి కనెక్షన్లు ఇచ్చే పనులు వేగవంతం చేయాలని ఇంజనీర్లను కలెక్టర్ ఆదేశించారు. ఇవ్వాల కలెక్టర్ కార్యాలయ సమావేశ మందిరంలో ఆర్డబ్ల్యుఎస్ డీఈ, ఏఈలతో ఇంటింటికి కుళాయి కనెక్షన్లు, శానిటరీ కాంప్లెక్స్ నిర్మాణాలు, తదితర వాటిపై ఆయన సమీక్షించారు. ఈ సందర్భంగా కలెక్టర్ మాట్లాడుతూ అవసరమైతే ఇంజనీరింగ్ అసిస్టెంట్లను వినియోగించుకోవాలని ఆదేశించారు. ఎన్ని కుళాయి కనెక్షన్లు పూర్తి చేశారనే అంశంపై మండలాల వారీగా సమీక్షించారు. జిల్లాలో ఇంటింటి కుళాయి కనెక్షన్లు 3 లక్షలు లక్ష్యంగా నిర్ణయించినట్లు పేర్కొన్నారు.